En málefnin?

Það er greinilegt að Framsóknarflokkurinn vill í ríkisstjórn eftir kosningar. Þeir eru til í hvað sem er. Í raun er það það sem formaðurinn er að segja. Ekki er að heyra að málefnin muni vefjast þar fyrir Framsóknarflokknum. Ráðherrastólarnir koma númer 1, málefnin númer 2. Fyrsti kostur er vinstri stjórn en ef það gengur ekki þá eru þeir til í stjórn með Sjálfstæðisflokknum. Spurningin er þessi: Eru hinir flokkarnir jafn ákafir í stjórn með Framsóknarflokknum? Og eiga málefnin engu að skipta?

Vill vera í vinstri stjórn

Fælandi áhrif

Stuðningskerfi, hverju nafni sem þau nefnast, eru fyrir þá sem á stuðningi þurfa að halda. Það er nöturleg staðreynd að alltaf skuli vera til einstaklingar sem sjá sér leik á borði að misnota þessi stuðningskerfi. Það er mikilvægt að allir viti að virkt eftirlit sé með öllum bótakerfum. Það hefur fælandi áhrif gagnvart hugsanlegri misnotkun. Þess vegna er gott að heyra að markvisst eftirlit sé hjá Vinnumálastofnun hvað varðar atvinnuleysisbætur.

Reynt að sporna við misnotkun á bótum

Ívilnandi?

Eins og ég skil þetta þá hafa þingmenn allra flokka sameinast um það að láta gömlu reglurnar, sem nú á að þrengja, gilda fyrir þá en nýju reglurnar byrji að taka til þeirra sem koma inn nýir eftir kosningar.

Ég sé ekki betur en að þarna hafi þingmenn sameinast um að taka ívilnandi ákvörðun fyrir sig. Hafi ég þá fyrir rangri sök þá er ég viss um að einhver mun leiðrétta mig - og ég mun að sjálfsögðu biðja þá afsökunar.

Afnám eftirlaunalaga miðist við kjördag

Meira um hliðvörð ...

Ég veit ekki hvaða orð ég á að nota um þessa frétt. Undrandi er ég en aðallega er ég reið yfir því að fram skuli koma að embætti sérstaks saksóknara skuli svo vopnlaust í þeim verkefnum sem það á að sinna. FME er stofnun sem allt bendir til að hafi því miður brugðist illa eftirlitshlutverki sínu. Miðað við fréttina hefur ekki verið gengið betur frá hnútum en svo að FME getur þvælst fyrir því að sérstakur saksóknari geti sinnt sínu hlutverki. Í annarri frétt á mbl.is í dag eru frekari dæmi um það að mál þurfa að fara í gegnum FME áður en sérstakur saksóknari fái þau. Vonandi mun þessi lagabreyting í einhverju bæta þessa stöðu og tryggja að það embætti geti farið að sinna málum af krafti.

Bankaleynd verður afnumin með öllu

Hliðvörður?

Þessi frétt og önnur sem birtist á mbl.is í morgun sýna með sérkennilegum hætti að FME virðist vera einhvers konar hliðvörður þegar kemur að því að sjá til þess að hugsanleg refsimál sem tengjast hruninu verði rannsökuð. Mér er óskiljanlegt af hverju rannsóknarnefndin getur ekki vísað málum beint til sérstaks saksóknara. Af hverju var búið til þetta millistig hjá FME? Hefur FME ekki nógum verkefnum að sinna þó þessu hafi ekki verið bætt á þá stofnun?

Óvíst að gögn að utan nýtist nefndinni

Endurnýjun?

Kjósendur kalla eftir endurnýjun og uppstokkun á framboðslistum flokkanna. Það er ljóst að þátttakendur í forvali VG í Norðausturkjördæmi svara með engum hætti því kalli. Ég sé ekki betur en að hér hafi valist sömu frambjóðendur og síðast í þrjú efstu sætin. Ný kona er komin í fjórða sætið. 

VG ætlar greinilega að svara kallinu um endurnýjun og uppstokkun í öðrum kjördæmum en NA. 

Steingrímur J. efstur í NA

Kostnaður við prófkjör

Það er nú ekki aðalmálið hvort við frambjóðendur í prófkjöri Sjálfstæðisflokksins getum sent einn eða fleiri tölvupósta á flokksbundna sjálfstæðismenn fyrir prófkjörið. Aðalmálið er það að Valhöll hefur lagt mikið kapp á það að gera frambjóðendum í prófkjöri kleift að kynna sig og áherslumál sín án þess að stofna til óheyrilegra fjárútláta. 

Í Reykjavík eru samtals fimm kynningarfundir með frambjóðendum í prófkjöri, tveir á vegum hverfafélaganna, einn á vegum Hvatar, einn á vegum Heimdallar og einn á vegum flokksins. Þá gefur flokkurinn út kynningarblað þar sem hver og einn frambjóðandi fær eina síðu til að kynna sig og stefnumál sín. Í opnu blaðsins er stutt kynning á öllum frambjóðendum. Blaðið verður borið í hvert hús í Reykjavík, sennilega á föstudag. Þá hefur verið opnuð heimasíða www.profkjor.isþar sem hver og einn frambjóðandi á öllu landinu er með sitt heimasvæði. Jafnframt eru þar kynningarmyndbönd frá öllum frambjóðendunum (mitt vantar að vísu ennþá af ókunnum ástæðum) og tenglar á heimasíður, bloggsíður og fésbókarsíður frambjóðenda.

Öll þessi kynning er ómetanleg fyrir frambjóðendur í prófkjörum Sjálfstæðisflokksins, ekki síst fyrir frambjóðanda eins og mig sem hef ákveðið að verja ekki fúlgum fjár vegna framboðs míns. Ég hef áður bloggað um það að mér finnst kostnaðarþak það sem sett hefur verið hjá Sjálfstæðisflokknum, 2,5 m.kr. vera alltof hátt. Auðvitað eru tilmæli um eyða miklu minna en þakið er engu að síður sett við þetta mark. Aðstæður í þjóðfélaginu eru slíkar að það er með engu móti hægt að réttlæta að frambjóðendur í prófkjörum séu að eyða slíkum fjármunum í baráttu fyrir því að ná sem öruggustu sæti á framboðslista flokks síns í komandi alþingiskosningum. 

Þeir sem vilja kynnast mér og mínum áherslum betur geta skoðað heimasíðu mína www.dogg.is. Á bloggsíðuna www.doggpals.blog.is, sem þú ágæti lesandi ert nú staddur á, hef ég sett viðtöl við mig, bæði í útvarpi og sjónvarpi.  Þá hef ég sett hér inn hlekki á ræður sem ég hélt á Alþingi þau tvö skipti sem ég settist á þing sem varamaður veturinn 2007-2008. Ég er með fésbókarsíðu sem þeir sem þar eru geta fylgst með. Auk þess eru fleiri hlekkir á heimasvæði mínu á www.profkjor.is. Auðvitað mun ég og stuðningsmenn mínir hringja í flokksbundna sjálfstæðismenn í Reykjavík til að minna á framboð mitt. En þetta, ásamt þeirri kynningu sem Sjálfstæðisflokkurinn stendur fyrir og rakin er hér að framan, er sú kynning sem ég ætla að meginstefnu til að láta duga í þessu prófkjöri.

Það kemur svo í ljós eftir prófkjörið 13. og 14. mars nk. hvort þetta dugir til árangurs, en ég sækist eftir 2. - 4. sæti í prófkjörinu, eða hvort horfast þurfi í augu við að meira hefði þurft til að koma. 

Fá að senda einn tölvupóst frá Valhöll

Skýra kosti

Það er auðvitað ekkert á móti því að einhverjir stjórnmálaflokkar ákveði fyrir kosningar að skuldbinda sig til að starfa eingöngu með einhverjum öðrum stjórnmálaflokki eftir kosningar. Hætt er hins vegar við að "stjórnarmyndunarviðræður" verði þá að fara fram fyrir kosningar því kjósendur verða að vita hvaða málum sú ríkisstjórn sem þeir þá í raun væru að kjósa yfir sig ætlaði að berjast fyrir.

Ef VG og Samfylkingin, sem nú eru saman í minnihlutastjórn, ætla þannig að binda sig við áframhaldandi stjórnarsamstarf eftir kosningar þá verða þessir flokkar skýrt að segja hvað þeir ætla að gera að kosningum loknum.

 Það tók stjórnina sem nú situr mjög marga daga að semja um stjórnarsáttmála fyrir 80 daga ríkisstjórn. Hætt er við að mikil vinna og tími fari í að semja um stjórnarsáttmála til fjögurra ára. Ætli málið eigi ekki eftir að stranda á því að fyrirfram treysta þessir flokkar sér ekki til að sýna kjósendum á spilin hjá sér?

En það verða flokkarnir að gera, ætli þeir að bjóða fram undir þeim formerkjum sem þingmaðurinn leggur til. Annað er ekki hægt að bjóða kjósendum upp á.

Samfylkingin gangi bundin til kosninga

Yfirlýsing vegna athugasemdar fjárfestingabankans

Vegna athugasemdar fjárfestingabankans við fréttatilkynningu minni um framboð mitt í 2. - 4. sæti hjá Sjálfstæðisflokknum í Reykjavík hef ég sent eftirfarandi yfirlýsingu til fjölmiðla:

Saga Capital fjárfestingabanki hefur sent frá sér yfirlýsingu vegna fréttatilkynningar frá mér um framboð mitt í 2.- 4. sæti í prófkjöri Sjálfstæðisflokksins í Reykjavík. Þar er fullyrt að bankinn sé ekki og hafi aldrei verið til rannsóknar hjá efnahagsbrotadeild ríkislögreglustjóra. Vegna þessa vil ég upplýsa eftirfarandi:

Hinn 10. febrúar sl. lagði ríkissaksóknari fyrir efnahagsbrotadeild ríkislögreglustjóra að hefja rannsókn á sölu þriggja stjórnarmanna í SPRON með stofnfjárbréf með hliðsjón af 248. gr. almennra hegningarlaga. Þessi lagagrein fjallar um fjársvik.

Fjárfestingabankinn hafði milligöngu um sölu stofnfjárbréfa í eigu fyrirtækisins Sundagarða ehf., sem er í eigu eins þessara stjórnarmanna sem nú sætir rannsókn. Í ljósi þessarar rannsókn gefur auga leið að aðkoma fjárfestingabankans að þeirri sölu er undir rannsókn efnahagsbrotadeildar. Þá kærði ég og sonur minn forstjóra fjárfestingabankans nýlega til efnahagsbrotadeildar ríkislögreglustjóra fyrir brot á 248. gr. almennra hegningarlaga eða hlutdeild í slíku broti, fyrir umboðssvik skv. 249. gr. almennra hegningarlaga og fyrir margvísleg brot á lögum um verðbréfaviðskipti nr. 33/2003 og lög um fjármálafyrirtæki nr. 161/2002.

Aðdragandi málsins er sá að eftir að stjórn SPRON ákvað 17. júlí 2007 að leita samþykkis stofnfjáreigenda fyrir því að breyta SPRON í hlutafélag og skrá hlutabréfin á markaði seldu þrír stjórnarmenn stofnfjárbréf í SPRON. Þessi viðskipti voru ekki tilkynnt og þess gætt að leyna þeim fyrir stofnfjáreigendum. Einkahlutafélag í minni eigu keypti 20. júlí 2007 stofnfjárbréf af umræddum fjárfestingabanka, bréf sem síðar kom í ljós að fjárfestingabankinn hafði keypt nánast á sama augnabliki af Sundagörðum ehf, fyrirtæki í eigu stjórnarmanns í SPRON.

Þegar í ljós kom í byrjun nóvember 2007 að stjórnarmaður í SPRON í nánum tengslum við fjárfestingarbankann var upphaflegur seljandi stofnfjárbréfanna rifti félag mitt kaupunum og síðan hafa staðið málaferli milli félags míns og fjárfestingabankans.

Aðalmeðferð í málinu var 25. febrúar sl. í Héraðsdómi Reykjavíkur. Í vitnisburði forstjóra fjárfestingabankans fyrir dómi kom fram að stjórnarmaðurinn í SPRON óskaði þess 18. júlí 2007, daginn eftir áðurnefndan stjórnarfund, að fjárfestingabankinn keypti af fyrirtæki sínu, Sundagörðum ehf., öll stofnfjárbréf í eigu fyrirtækisins í SPRON. Sagðist forstjórinn hafa ráðið stjórnarmanninum frá að selja öll stofnfjárbréf sín, en niðurstaðan varð sú að hann seldi fyrir um 2 milljarða króna. Þetta gerði hann hafandi aðgang að upplýsingum, m.a. um aðferðir og forsendur í verðmati Capacent, umfram það sem markaðurinn vissi. Hann lét nægja að afla heimildar regluvarðar SPRON en tilkynnti öðru leyti ekki um þessi viðskipti, sem voru staðfest á stjórnarfundi SPRON nokkrum dögum síðar. Í vitnisburði forstjórans kom fram að frá endanlegu samkomulagi við stjórnarmanninn í SPRON var ekki gengið fyrr en eftir að forstjórinn sjálfur hafði frumkvæði að því að bjóða félagi mínu umtalsvert magn stofnfjárbréfa til kaups og lána fyrir öllu sem keypt yrði. Eins og áður segir er umræddur stjórnarmaður í SPRON eigandi fyrirtækisins Sundagarðar ehf. sem var og er 2. stærsti eigandi fjárfestingabankans og situr maðurinn nú í stjórn fjárfestingarbankans.

Af þessu má vera ljóst að stjórnarmaður í fjárfestingabankanum og næst stærsti eigandi bankans sætir nú lögreglurannsókn að fyrirlagi ríkissaksóknara vegna gruns um fjársvik. Forstjóri fjárfestingarbankans hefur verið kærður til efnahagsbrotadeildar ríkislögreglustjóra vegna meintra brota á almennum hegningarlögum, lögum um verðbréfaviðskipti og lögum um fjármálafyrirtæki.

Dögg Pálsdóttir, 4. mars 2009

 

Segja enga rannsókn í gangi

Vika

er langur tími í pólitík segir einhvers staðar. Sjö vikur eða þar um bil eru til kosninga. Það er heil eilífð á mælikvarða stjórnmálanna.

Það er því algerlega ómögulegt að segja hvað gerist í Alþingiskosningunum 25. apríl nk. Tíminn einn leiðir það í ljós.

En það er skiljanlegt að vinstri menn geri sér von um mikla vinstri sveiflu og í ljósi þess sem á undan er gengið er ekki ólíklegt að einhver vinstri sveifla verði. Skoðanakannanir benda eindregið til þess en við mat á þeim verður þó að hafa í huga hve margir kjósenda neita að gefa upp hvað þeir hyggjast gera. Sjálfsagt eru þeir ekki einu sinni búnir að ákveða sig. Þeir bíða átekta eftir því að sjá hvernig framboðslistar stjórnmálaflokkanna verða skipaðir.

Í þau verkefni sem framundan eru þarf fólk með reynslu og þekkingu. Undir þeim formerkjum gef ég kost á mér í prófkjöri Sjálfstæðisflokksins í Reykjavík og leita eftir stuðningi í 2., 3. eða 4. sætið á listanum.

Gæti orðið mesta vinstri sveifla sem sést hefur hér