Slæm frétt

Ég velti fyrir mér hvort ástæða þess að okkur hefur farið aftur á síðustu fimm árum kunni að vera sú að við gefum okkur minni tíma en áður til að lesa með börnum og hlusta á þau lesa upphátt.

Þegar herra Sigurbjörn Einarsson biskup fékk verðlaun Jónasar Hallgrímssonar fyrir stuttu þá kom hann inná þetta og undirstrikaði nauðsyn þess að nenna því að tala af viti við börn, leiðrétta ambögur, kenna þeim fallegt orðalag og falleg vers. Hans skilaboð voru skýr. Ég held að þessi frétt árétti þau skilaboð og mikilvægi þeirra.

Lesleikni íslenskra barna í meðallagi

Saklaus þar til sekt er sönnuð

Af hverju hefur TR ekkert gert í 14 ár? Mér finnst það mikilvægasta atriðið í þessari frétt, þótt vissulega séu þær alvarlegar sakirnar sem á heilbrigðisstarfsmanninn eru bornar. Í því sambandi verðum við að muna að enginn er sekur fyrr en sekt er sönnuð.

TR þarf að útskýra með trúverðugri hætti en hér er gert í þessari frétt af hverju þeir hafa setið með hendur í skauti í 14 ár gagnvart grunsemdum um alvarleg fjársvik úr opinberum sjóðum. Af hverju var málinu ekki fyrir löngu kært til lögreglu? 

Grunur um 200 milljóna króna svik

Blessun fylgir barni hverju

Samkvæmt upplýsingum á heimasíðu Ingunnarskóla (hér) eru starfsmen samtals 72 (43 kennarar og 29 starfsmenn). Mér reiknast því til að kringum 28 % starfsmanna Í Ingunnarskóla hafi eignast börn á rúmu ári.

Ég sé ekki betur en að starfsmenn á mínum vinnustað slái þessa frjósemi út. Á vinnustaðnum hafa að jafnaði starfað 10 starfsmenn síðustu 12 mánuði. Frá apríl til október fæddust starfsmönnum þrjú börn og hið fjórða mun fæðast í janúar nk. Þar með hafa 40% starfsmanna eignast börn á 10 mánuðum. Ef tekið yrði með í reikninginn að tveir þessara tíu starfsmanna eru komnar úr barneign miðað við hefðbundnar skilgreiningar (50+) þá hækkar frjósemishlutfallið enn.  Ef litið er lengra aftur í tímann þá verður staðan sú í janúar nk. að starfsmönnum vinnustaðarins hafa fæðst sex börn á tveimur árum og þremur mánuðum. Er það ekki rúmlega hálft knattspyrnulið? Geri aðrir vinnustaðir betur.

Starfsmenn eignuðust hátt í 20 börn á rúmu ári

Skýrður og óútskýrður launamunur kynjanna

Sá launamunur sem skiptir mestu og sem þarf að ráðast á er óútskýrður launamunur karla og kvenna. Hér er ágætis útskýring á launamun kynjanna og mati á tölfræðilegum upplýsingum um hann. Þar kemur fram að samanburður á launum kynjanna eftir upplýsingum úr skattframtölum, en á þeim byggði rannsóknin sem um er fjallað í fréttinni, er óleiðréttur samanburður. Einhver framtíðarspá byggð á óleiðréttum samanburði á launum karla og kvenna sýnist því lítið annað en samkvæmisleikur, svo lítið mark er á henni takandi. 

Óútskýrður launamunur kynjanna er skv. síðustu rannsóknum kringum 10-12% (sjá hér). Þeim mun þarf að eyða. Ef menn einbeita sér að því að eyða þeim launamun þá tekst það á örfáum árum. 

Launajafnrétti árið 2072?

Óþarfa viðkvæmni?

Orðin ráðherra og sendiherra særa ekki málkennd mína. Ég held að kröftum okkar í jafnréttisbaráttunni sé mun betur varið í að einbeita okkur að einhverju þarfara en þessu, t.d. því að jafna hlutfall kynjanna alls staðar þar sem misvægi er í slíkum hlutföllum, auka umræðuna um jafnréttismál, t.d. jafna stöðu foreldra gagnvart börnum sínum. Svo ekki sé minnst á óútskýrðan launamun kynjanna.

Ég er sannfærð um það að þeir ágætu einstaklingar, karlar og konur, sem eru ráðherrar og sendiherrar eru stoltir af því að mega með réttu bera þessi starfsheiti og láta ,,herra" partinn í því ekki trufla sig. 

Lýsa yfir sigri og hætta II

Það fór eins og mig grunaði. Forystumaður VG knúði fram sátt í anda þess sem hún boðaði í Morgunblaðsviðtali í gær. OR knúin til að lýsa yfir ólögmæti fundar sem allir mættu á og tóku þátt í og síðan fékk hún málskostnað sinn frá OR.  Fróðlegt verður að fá upplýst hvað þessi málarekstur hennar hefur í heild kostað Reykvíkinga, sem eigendur OR.

Ég veit eiginlega ekki hvaða orð maður á að hafa um vinnubrögð af þessu tagi.

Lýsa yfir sigri og hætta.

Forystumaður VG beitir greinilega aðferð sem Johnson og Nixon var ráðlagt þegar Bandaríkin áttu í Víetnam-stríðinu. Hún lýsir yfir sigri og hættir. Öllum má þó ljóst vera að hún er með gjörtapað mál.

Það verður fróðlegt að fylgjast með sáttinni sem forystumaðurinn mun knýja fram við OR. Miðað við dómaframkvæmd þá hafði forystumaður VG aldrei lögvarða hagsmuni af því að fá dóm í máli sínu. Atburðarásin frá því að hún höfðaði málið skiptir engu í því sambandi, eins og forystumaðurinn sjálfur virðist halda. Miðað við viðtalið þá ætlar hann í krafti stöðu sinnar hjá Reykjavíkurborg líka að knýja það fram að í sáttinni felist viðurkenning á því að fundurinn hafi verið ólögmætur. Og svo mun hún sjálfsagt semja um, eins og ég hef áður bent á, að OR greiði fyrir hana lögmannskostnaðinn.

Ég veit eiginlega ekki hvaða orð maður á að hafa um vinnubrögð af þessu tagi. 

Svandís tilbúin til sátta í dómsmálinu

Sátt?

Það er skiljanlegt að menn vilji gera forystumanni VG í borgastjórn kleift að ljúka án dóms því máli sem hann höfðaði.

Fundurinn virðist ólöglega boðaður miðað við þær reglur sem giltu um boðun fundar. Engu að síður mættu til fundar allir sem á fundinum áttu að vera og tóku þátt í fundarstörfum. Í 4. mgr. 83. gr. laga um meðferð einkamála segir að ef stefndi sækir þing við þingfestingu máls breytir engu þótt stefna hafi ekki verið birt eða komið á framfæri við hann, galli hafi verið á birtingu eða birt með of skömmum fyrirvara. Sem sé, það er ákveðin meginregla að þótt boðun sé ólögmæt þá getur eftirfarandi málsmeðferð verið lögmæt ef þeir sem hagsmuna eiga að gæta mæta til að gæta hagsmuna sinna, þrátt fyrir ólögmæta boðun.

Frávísunarkrafa OR bendir til að málið geti ekki fengið efnislega úrlausn - enda vandséð hvernig forystumaður VG getur átt lögvarða hagsmuni af því að fá dóm í þessu máli. Það er athyglisvert, sem fram hefur komið, að OR gerði ekki málskostnaðarkröfu á forystumanninn. Það er óvenjulegt í dómsmáli að stefndi geri ekki málskostnaðarkröfu á stefnanda. Ætli sáttin felist einnig í því að OR greiði lögmannskostnað forystumannsins líka?

Falið að leita sátta í dómsmáli OR og Svandísar

Verðugur verðlaunahafi

Herra Sigurbjörn Einarsson biskup er sannarlega verðugur viðtakandi verðlauna Jónasar Hallgrímssonar. Herra Sigurbjörn nefndi í þakkarávarpi sínu nauðsyn þess að nenna því að tala af viti við börn, leiðrétta ambögur, kenna þeim fallegt orðalag og falleg vers. Þetta er þörf og mikilvæg ábending.

Sigurbjörn Einarsson hlaut verðlaun Jónasar Hallgrímssonar

Ónákvæm frétt

Hún er býsna ónákvæm þessi frétt, hvort sem þar er um að kenna blaðamanninum sem fréttina skrifaði eða lélegri fréttatilkynningu frá Reykjavíkurborg.

Embætti borgarritara er gamalt embætti hjá Reykjavíkurborg sem R-listinn lagði niður 2004-2005 í einni af fjölmörgum stjórnkerfisbreytingum sem sá meirihluti beitti sér fyrir. Það var ekki stofnað fyrr á þessu ári eins og fullyrt er í fréttinni heldur endurvakið af nýjum meirihluta Sjálfstæðisflokksins í vor (sbr. þessa frétt). Nýr R-listi er ekki fyrr búinn að taka við en hann leggur embættið niður aftur. Eru engin brýnni verkefni til að sinna en þetta?

Embætti borgarritara lagt niður