Spennandi

Af þessu má ráða að Hillary hafi áhuga á embætti utanríkisráðherra, Bill styðji hana heilshugar og vilji ekki þvælast fyrir henni á leið hennar í það embætti. Og ef af verður er ekki annað hægt að segja en að Obama sýni Hillary Clinton mikla virðingu og traust.

Bill gerir sitt til að tryggja Hillary embættið

Þjóðstjórn?

Halda menn í alvöru að þjóðstjórn leysi einhvern vanda? Þar fyrir utan leyfi ég mér að halda að stjórnarandstöðuflokkarnir séu mjög tregir til að ganga til þjóðstjórnar - þeir vilja kosningar, sérstaklega VG því VG heldur að þeir fái svo mikið uppúr kjörkössunum. Ég er sannfærð um það að ef til kastanna kæmi þá myndu stjórnarandstöðuflokkarnir allir neita þátttöku í þjóðstjórn - enda er það miklu einfaldara og ábyrgðarminna að vera alltaf á móti.

Taka höndum saman um þinghúsið

Sjálfgefið

Það hlýtur að vera sjálfgefið að skoða þurfi launalækkun hjá opinberum starfsmönnum með sama hætti og fyrirtæki eru nú að lækka laun hjá sínum starfsmönnum. Með sama hætti hljóta opinberir aðilar að þurfa að endurmeta þörf á fjölda opinberra starfsmanna, en eins og allir vita hefur fjöldi þeirra aukist allmikið síðustu árin. Það verður ekki við það unað að ríkið og sveitarfélög verði einu atvinnurekendurnir í landinu sem ekkert skoði hvort bregðast megi við hagræðingarkröfum með fækkun starfsfólks og/eða lækkun launa starfsfólks. Þetta er það sem atvinnurekendur á hinum almenna markaði eru þegar búnir að gera og eiga eftir að gera. Þá hlýtur það einnig að vera sjálfgefið að ríki og sveitarfélög ræði við eigendur húsnæðis sem þeir leigja með það fyrir augum að fá a.m.k. tímabundna lækkun á leigu. Þetta er það sem atvinnurekendur á almennum markaði eru líka að gera.

Laun embættismannanna lækkuð?

Er það sjálfgefið?

Það kemur á óvart að það þyki sjálfgefið að af þessu fé þurfi að greiða tekjuskatt. Ríkissjóður getur ekki haft það í neinum sínum tekjuáætlunum að fá tekjuskatt af þessu fé því það átti ekki að koma til útgreiðslu í formi lífeyris fyrr en eftir langan tíma og yfir langan tíma. Miðað við þær upplýsingar sem fram koma í fréttinni myndi ríkissjóður óvænt fá á einu bretti milljarða í skattgreiðslur verði ákveðið að leyfa útlausn á viðbótarlífeyrissparnaðinum.

Eigendur þessa viðbótarlífeyrissparnaðar er almenningur í landinu sem orðið hefur fyrir miklum skakkaföllum síðustu mánuði og vikur vegna bankahruns og vegna mikillar verðbólgu. Eiginfjárbruni fasteignaeigenda hefur verið mikill og er nú svo komið að sumir fasteignaeigendur, sem áttu dágóðan höfuðstól í fasteignum sínum, þegar þær voru keyptar, eiga nú jafnvel minna en ekki neitt. Almenningur situr uppi með þetta tjón bótalaust og höfuðstóllinn sem settur var í fasteignakaupinn mun líklega aldrei koma aftur - eða þá a.m.k. ekki fyrr en eftir mjög langan tíma ef verðbólga verður nánast engin og fasteignaverð hækkar umtalsvert á ný. 

Mér finnst einfaldlega að nú eigi ríkið að sýna að það hafi einhvern skilning á kjörum almennings í landinu og þeim skakkaföllum sem almenningur hefur orðið fyrir. Það sýnir ríkið best með því að ákveða að af þessum viðbótarlífeyrissparnaði verði annað hvort enginn tekjuskattur greiddur eða eingöngu fjármagnstekjuskattur, kjósi almenningur að leysa hann út, enda millifærist viðbótarlífeyrissparnaðurinn beint frá lífeyrissjóði og t.d. inn á niðurgreiðslu höfuðstóls fasteignalána eða annarra skulda eiganda viðbótarlífeyrissparnaðarins.

Skattur af sparnaði strax í vasa ríkisins

Verðug rannsóknarefni?

Breytist afstaða kvenna gagnvart körlum með aldrinum? Breytist afstaða karla til annarra karla með aldrinum? Breytist afstaða karla til kvenna með aldrinum? Niðurstaða þessarar rannsóknar er út af fyrir sig áhugaverð - ekki síst í ljósi skýringa sem gefnar eru á því af hverju konur mildast gagnvart kynsystrum sínum með aldrinum. Áhugaverðast hefði mér fundist að vita hvort afstaða karla til kvenna tengist aldri karlanna annars vegar og aldri kvennanna hins vegar og hvort afstaða karla til kvenna breytist með aldri beggja. 

Konur mildast með aldrinum

Fangelsi?

Samkvæmt 100. gr. umferðarlaga varða brot gegn lögunum sektum eða fangelsi allt að tveimur árum. Ef brotasaga sem þessi dugir ekki til fangelsisdóms þá spyr maður einfaldlega: Hvað þarf til að fá fangelsisdóm fyrir ítrekaðan akstur undir áhrifum fíkniefna?

Tekinn átta sinnum á rúmum þremur mánuðum

Mikill, meiri, mesti og sannasti

Óttalega er það hjákátlegt að metast um það hver sé mesti eða sannasti framsóknarmaðurinn. Hafa menn ekkert þarfara að gera? En meðan framsóknarmenn vega hvern annan í innanflokksátökum sýnist mér að andstæðingar þeirra í pólitík þurfi ekki að hafa miklar áhyggjur af þessum pólitíska andstæðingi. Framsóknarflokkurinn virðist vera að eyða sjálfum sér í tilgangslausum innbyrðis deilum um það hver þeirra sé mestur eða sannastur.

„Bjarni móðgar framsóknarmenn"

Vill Seðlabankinn ekki bara upplýsa allt sem hann veit?

Það eru út af fyrir sig athyglisverðar og áhugaverðar upplýsingar, ef réttar eru, að einn aðili skuldi viðskiptabönkunum þremur eitt þúsund milljarða. Og sannarlega þarf að skoða hvernig það gat gerst að einn aðili fengi slíka lánafyrirgreiðslu í bankakerfinu.

Seðlabankinn gagnrýnir að almenningur fái ekki neinar gagnlegar upplýsingar um hvað gerðist. Undir þá gagnrýni má taka.

En það er greinilegt að Seðlabankinn telur sig hafa allar þær gagnlegu upplýsingar sem almenningur þarf. Vill Seðlabankinn þá ekki halda áfram að upplýsa almenning? Er nokkur ástæða til að láta staðar numið við að upplýsa um stórfelldar lántökur eins aðila? Almenningur getur þá best sjálfur metið hvort Seðlabankinn sé eins saklaus í þessu máli og reynt er að telja okkur trú um.

Skuldar þúsund milljarða

Misskilningur?

Fréttin sem vísað er til í www.euobserver.com er hér. Ég sé ekki betur en að verið sé að misskilja málið og telja að ákvörðun Sjálfstæðisflokksins um Evrópumál frá sl. föstudegi sé einhvers konar ríkisstjórnarákvörðun. Enda er vandséð hvernig hægt er að sækja um aðild nema annað af tvennu gerist: Alþingi samþykki að fela ríkisstjórnin að sækja um aðild eða að meirihluti kjósenda í þjóðaratkvæðagreiðslu ákveði að sótt verði um aðild. Hvorugt hefur gerst en í umræðunni er að bera það undir þjóðaratkvæði hvort sækja eigi um aðild og virðist það afstaða flestra stjórnmálaflokka að standa þannig að málum. Ég hef enga trú á því að það sé rétt að utanríkisráðuneytið hafi þegar lagt drög að umsókn um aðild.

Drög lögð að umsókn um ESB-aðild?

Að njóta vafans

Ég óttast að yfirvöld sem hafa með málefni barna að gera láti foreldra alltof oft njóta vafans, í stað þess að láta börnin gera það.

Barnaverndaryfirvöld gagnrýnd í Bretlandi