Tímamót ...

Það eru auðvitað söguleg tímamót í jafnréttisbaráttunni að kona verði forsætisráðherra og leiði eigin ráðuneyti. Allir jafnréttissinnar hljóta að fagna því. En það er rétt að halda því til haga að þetta er ekki í fyrsta sinn sem kona sinnir starfi forsætisráðherra. Þorgerður Katrín Gunnarsdóttir hefur margsinnis verið starfandi forsætisráðherra á liðnum misserum í fjarveru skipaðs forsætisráðherra.

Það er áhugavert að lesa lýsingar samstarfsmanna á verðandi forsætisráðherra. Gildir hér: "Vinur er sá, er til vamms segir" eða eru menn bara spældir og geta ekki unnt verðandi forsætisráðherra vegtyllunni?

„Jóhanna vinnusöm en þröngsýn"

Hætt að koma á óvart

Fréttir um lánveitingar Kaupþings síðustu dagana og vikurnar fyrir hrun eru hættar að koma á óvart. Það var gott að sjá í viðtali við formann rannsóknarnefndarinnar sem birtist á mbl.is í morgun að rannsóknarnefndin ætlar að skoða þessi mál. Það var líka gott að sjá að rannsóknarnefndin ætlar að skoða ferlið í aðdraganda einkavæðingar bankanna 2002. Svo hlýtur þetta og fleiri mál af sama tagi að verða meðal þess fyrsta sem sérstakur saksóknari lætur til sín taka.

Milljarðalán skömmu fyrir hrun

Stóru málin ...

Það eru greinilega stóru málin sem vefjast mest fyrir Samfylkingunni og VG í þessum stjórnarmyndunarviðræðum. Tímasetning kosninga er það sem þau helst greinir á um. Skiptir máli hvort kosið er vikunni fyrr eða seinna? Búið er að ákveða að kjósa í vor. Að vísu gæti fylgið byrjað að tætast af VG því lengur sem þeir sitja í starfsstjórninni. Þess vegna vilja þeir sjálfsagt að kosið verði sem fyrst. Hver var að tala um þjóðarhagsmuni og flokkshagsmuni?

Greinir á um kosningar

Meðferð Samfylkingarinnar á varaformanni sínum ...

hefur um langt skeið vakið mikla athygli. Fram hjá honum hefur verið gengið með niðurlægjandi hætti aftur og aftur. Varaformaðurinn hefur sjálfsagt skynjað að við myndun nýrrar stjórnar yrði hann enn einu sinni hundsaður. Ég skil það vel að hann skuli gefast upp á þeim tætlum sem Samfylkingin er. Honum fylgja góðar óskir í hverju því sem hann tekur sér fyrir hendur. Það er örugglega ágætt líf og jafnvel betra líf eftir líf í pólitík. 

Ágúst Ólafur hættir

Aðdáunarvert framtak

Þetta framtak Bylgjunnar og þeirra sem hugmyndina áttu var tær snilld. Það er sérlega ánægjulegt að framtakið sé að vekja jafn mikla athygli og raun ber vitni í Bretlandi. Okkur veitir ekki af, eftir alla neikvæðu umræðuna um Ísland, að fjallað sé um Íslendinga með jákvæðum og góðum hætti. Svo er auðvitað sérlega skemmtilegt að leggja öldruðum Bretum lið með þessum hætti eftir framgöngu forsætisráðherra þeirra gagnvart okkur sl. haust. Hinn almenni Breti getur hins vegar ekki að því gert hvernig forsætisráðherra þeirra kaus að haga sér. Með framtakinu sýnum við hug okkar til Breta í verki. Það er hrikalegt að sjá að frá desember 2007 til mars 2008, á fjögurra mánaða tímabili, hafi um 25.000 eldri borgarar dáið úr kulda í Bretlandi. Ótrúlegt. Íslenskar ullarflíkur eiga eftir að hlýja öldruðum Bretum. Það er sérstakt fagnaðarefni.

Gefa breskum eldri borgurum íslenska ull

Nú reynir á ...

Minnihlutastjórn VG og Samfylkingar virðist um það bil að fæðast. Þetta verður bráðabirgðastjórn miðað við þróun mála í gær og skýra kröfu VG um kosningar sem fyrst. Það kemur því á óvart að heyrst hefur að í ríkisstjórninni verði 12 ráðherrar, sex frá hvorum flokki. Vonandi kemur annað í ljós því sjálfsagt er að ríkisstjórnin, sem svo mjög hefur gagnrýnt aðra, sýni aðhald og sparnað með því að byrja á því að fækka ráðherrum. Varla þurfum við 12 ráðherra, þar af a.m.k. sex nýja þá 100 daga eða þar um bil sem eru fram að kosningum.

Boðuð á fund forseta

Seint ...

geta pólitískir andstæðingar dómsmálaráðherra haldið því fram að með þessari skipun hafi hann hyglt pólitískum flokksbróður. En kannski munu einhverjir halda því fram að pólitísk samtrygging hafi hér verið á ferð. Sjálfri finnst mér þetta góð ráðstöfun. Í mínum huga er ekki vafi um það að sú sem skipuð var sé vel hæf í starfið, jafnvel þótt hún sé "bara" fv. alþingismaður. Ég óska Margréti til hamingju með skipunina. Ég veit að hún á eftir að stýra málum á Litla-Hrauni með miklum sóma og hefði sjálf ekki treyst neinum öðrum betur til starfans.

Margrét ráðin forstöðumaður Litla-Hrauns

Hugur VG stefnir

augljóslega á minnihlutastjórn þeirra og Samfylkingar. Ekki erfitt að lesa það úr þessum orðum formanns VG. Enda fleiri stólar fyrir þá í slíkri stjórn en í þjóðstjórn.

Vinstri grænir reiðubúnir til viðræðna

Enginn veit

hvað átt hefur fyrr en misst hefur ...

Vonandi vöknum við ekki upp við það að fráfarandi ríkisstjórn hafi eftir allt saman verið illskárri en það sem eftir kemur. Vinstri stjórnir hafa aldrei reynst vel á Íslandi. Það segir sagan okkur.

Fráfarandi ríkisstjórn hefur gert ýmis mistök frá hruninu. En hún hefur líka gert ýmislegt - en verið ákaflega léleg í að upplýsa almenning um það. Á því fellur hún. Og langlundargeðinu gagnvart bankastjórn Seðlabanka Íslands.

Geir til Bessastaða klukkan 16

Óvæntur snúningur

Það kemur á óvart að allt í einu skuli Jóhanna Sigurðardóttir dregin upp úr hatti og boðin fram sem forsætisráðherra af hálfu Samfylkingarinnar. Byggir það á því að í skoðanakönnunum nýtur hún mest trausts kjósenda?

Staðreyndin er sú að Samfylkingin setti fram kröfu sem fyrirfram var vitað að Sjálfstæðisflokkurinn gat ekki fallist á og enginn stjórnmálaflokkur hefði fallist á undir sömu kringumstæðum. A.m.k. gat ég ekki skilið orð stjórnmálafræðings sem verið var að tala við á RÚV með öðrum hætti.

Mér sýnist ljóst að þjóðstjórn verður ekki mynduð enda skilyrði Samfylkingarinnar að hún verði leidd af Jóhönnu Sigurðardóttur. Minnihlutastjórn Samfylkingar og VG með stuðningi Framsóknarflokksins undir forsæti Jóhönnu Sigurðardóttur er sú stjórn sem mynduð verður og mun (vonandi) lafa fram yfir kosningar. En athyglisvert var að utanríkisráðherra útilokaði ekki að fresta kosningum. Hvað skyldi VG, sem hrópað hefur eftir kosningum strax, segi við því, þegar þeir verða komnir í stólana?

Það er kaldhæðnislegt að bankastjórn Seðlabankans situr enn þótt ríkisstjórnin sé fallin. Í raun var það þaulseta bankastjórnar Seðlabanka Íslands sem á endanum felldi ríkisstjórnina. 

Jóhanna næsti forsætisráðherra?