Fádæma ósmekklegt viðtal

Hvernig dettur forsvarsmanni Radda fólksins að halda því fram að tilkynning um alvarleg veikindi forsætisráðherra sé pólitísk reykbomba? Trúverðugleiki forsvarsmanna sem tjá sig með þeim hætti sem forsvarsmaður Radda fólksins gerði í þessu viðtali er enginn orðinn, hafi hann einhvern tímann verið einhver.

Hænuskref í rétta átt

Tilfinningalaust fólk?

Ég skil ekki ummæli af þessu tagi. Hvernig er hægt að láta pólitík blinda sig svo að hún víki til hliðar öllum mannlegum tilfinningum?

„Ekki farin að finna til með honum ennþá“

Er ekki mál að linni?

Ég hygg að þjóðinni allri sé brugðið við tíðindi dagsins. Forsætisráðherra hefur tilkynnt að hann glími við erfið veikindi. Hugur okkar allra er hjá honum og fjölskyldunni. Við biðjum þess að hann fái fullan bata.

Forsætisráðherra hefur jafnframt tilkynnt að stefnt sé að kosningum 9. maí nk. og að ríkisstjórnin sitji þangað til. Mótmælendur hafa náð því sem virtist meginmarkmiðinu. Kosningar í vor eru staðreynd.

Þarf að halda þessum mótmælum áfram? Er ekki mál að linni?

Landsmenn taki þátt í friðsömum mótmælum

Er VG ekki sjálfrátt?

Mér ofbýður hvernig forystumenn VG bregst við tíðindum dagsins. Ég hygg að fleiri en sjálfstæðismönnum sé brugðið við fréttir af alvarlegum veikindum forsætisráðherra. Ég trúi ekki öðru en að öllum landsmönnum sé brugðið. 

Núverandi forysta VG hefur greinilega mestar áhyggjur af því að ef það dragist í örfáa mánuði að kjósa þá verði tími til breytinga á hjá þeim líka og að eftir breytingum á forystu verði kallað. Til þess má núverandi forysta greinilega ekki hugsa. Þeir sjá í hillingum ráðherrastólana eftir kosningar og vilja sjálfir setjist í þá stóla. 

Ögmundur: Lofar ekki góðu að bíða

Hrina bótakrafna?

Þetta er sérlega ánægjulegur dómur fyrir stefnanda en um leið hlýtur hann að vera alvarlegt áhyggjuefni fyrir fyrrum stjórnarmenn í Glitni, sem með dómnum eru gerðir persónulega ábyrgir fyrir bótakröfunni. Væntanlega munu fleiri hluthafar fylgja í fótspor Vilhjálms.

Gætu þurft að greiða út 35 milljarða króna

Óskiljanlegt

Það að formaður VG skuli njóta mest trausts er að mínu mati óskiljanleg niðurstaða. Og hrædd er ég um að ef þessi könnun væri gerð nú gæti önnur niðurstaða fengist.

Af hverju? Jú, ég held að mörgum hafi brugðið þegar formaður VG sagði í Kastljósviðtali á miðvikudag að helst vildi hann hætta samvinnunni við Alþjóðagjaldeyrissjóðinn og skila láninu. Aðspurður um hvað hann vildi gera - þá vafðist honum tunga um höfuð og fátt varð um svör.

Og núna áðan var viðtal við formann VG eftir að forsætisráðherra hafði tilkynnt um alvarleg veikindi sín, stefnt væri að kosningum 9. maí og að stjórnin reiknaði með að sitja fram yfir kosningar. Ég hygg að fleirum en mér hafi brugðið við að formaður VG var uppteknastur við að heimta að kosið yrði miklu fyrr, helst fyrir páska. Gæti verið að formaður VG hafi nú áhyggjur af því að grasrótin í VG vilji forystuskipti þar? Þess vegna vilji hann kjósa sem fyrst svo það reynist tæknilega ógerlegt? Fyrir liggur að Framsókn hefur skipt um forystu. Nýr formaður tekur við í Sjálfstæðisflokknum á landsfundi í lok mars og formannsskipti hafa hugsanlega í för með sér meiri breytingar á forystu flokksins.

Kallað er eftir breytingum, uppstokkun í pólitíkinni. Þjóðin vill nýtt fólk. Það ákall gæti náð inn fyrir dyr VG þó þeir hafi setið utan ríkisstjórnar lengi. Formaður VG hefur verið í því embætti í 10 ár. Mörgum finnst það sjálfsagt alveg nógur tími.

Steingrímur J. nýtur mests trausts

Mér er brugðið

Mér er sjálfsagt líkt og landsmönnum öllum brugðið við yfirlýsingu forsætisráðherra. Ég sendi honum hugheilar óskir um góðan og skjótan bata vegna þeirra alvarlegu veikinda sem hann þarf nú að takast á við.

Dregur til tíðinda ...

Ég tel líklegt að: a) landsfundi í næstu viku verði frestað; b) tilkynnt verði um kosningar í júní eða september; c) tilkynnt verði að núverandi stjórn sitji til kosninga. Er þó ekki viss með þetta síðasta. Þetta kemur víst í ljós á næstu mínútum.

Miðstjórnarfundur að hefjast

Samfylkingin stikkfrí?

Það er fróðlegt að lesa að þingmenn Samfylkingar telja að Sjálfstæðisflokknum einum verði kennt um stöðu mála nú. Ég veit ekki betur en að frá því í maí 2007 hafi Sjálfstæðisflokkur og Samfylking staðið stjórnarvaktina saman. Hvor flokkur er með jafnmarga ráðherra. Bankamálaráðherrann er úr Samfylkingunni. Í stjórnum ýmissa stjórnvalda eiga Samfylkingarmenn sína fulltrúa, líkt og Sjálfstæðisflokkurinn og jafnvel aðrir stjórnmálaflokkar líka. Frá því að ríkisstjórnin 2007 var mynduð héldu bankarnir áfram að vaxa. Icesave reikningarnir uxu líka, byrjað var á Icesave í Hollandi árið 2008. Allt gerðist þetta undir glöggu auga bankamálaráðherrans úr Samfylkingunni og FME.

Ef Samfylkingin hafði áhyggjur af fjármálalífinu þegar hún fór í ríkisstjórn í maí 2007, af hverju gerði bankamálaráðherrann og FME ekki neitt? Í stjórnarsáttmála ríkisstjórnar Sjálfstæðisflokks og Samfylkingar segir m.a. (stjórnarsáttmálann í heild má lesa hér):

Í umbreytingu íslensks atvinnulífs á undanförnum árum felst meðal annars aukið vægi ýmiss konar alþjóðlegrar þjónustustarfsemi, þar á meðal fjármálaþjónustu. Ríkisstjórnin stefnir að því að tryggja að slík starfsemi geti áfram vaxið hér á landi og sótt inn á ný svið í samkeppni við önnur markaðssvæði og að útrásarfyrirtæki sjái sér áfram hag í að hafa höfuðstöðvar á Íslandi. Áhersla verður lögð á að efla Fjármálaeftirlitið til þess að íslenski fjármálamarkaðurinn njóti fyllsta trausts.

Ekki er að greina í þessum hluta stjórnarsáttmálans miklar áhyggjur af stærð bankakerfisins. Þvert á móti sýnist að stefnt hafi verið að frekari vexti þess kerfis hér á landi. Efla átti Fjármálaeftirlitið til að íslenski fjármálamarkaðurinn nyti fyllsta trausts. Hver átti að sjá um það? Bankamálaráðherrann væntanlega. Við þekkjum árangurinn af þeirri vinnu. Bankakerfið hrundi og fjármálamarkaðurinn íslenski nýtur einskis trausts, hvorki innanlands né erlendis.

Fram hafa komið fréttir um að frá því síðla árs 2007 / snemma árs 2008 hafi stjórnvöldum og einstökum ráðherrum, jafnvel ríkisstjórninni allri verið gerð grein fyrir því af fjölmörgum aðilum, innlendum sem erlendum, að hér stefndi bankakerfið í þrot og gæti hrunið. Litið ef nokkuð var gert til að bregðast við af hálfu stjórnvalda. Engar skýringar hafa fengist á því. Er Samfylkingin, bankamálaráðherrann, FME, stikkfrí af því aðgerðarleysi? Er það aðgerðarleysi Sjálfstæðisflokknum einum að kenna?

Sem sjálfstæðismaður gerði ég mér glögga grein fyrir ábyrgð míns flokks á því sem gerst hefur. Ég hef ekki heyrt annað en að aðrir flokksmenn geri það líka, sem og forysta flokksins. Landsfundur Sjálfstæðisflokksins hefst eftir viku. Þar verður ugglaust fjallað um ábyrgð Sjálfstæðisflokksins á núverandi ástandi og hvernig sú ábyrgð verður best öxluð.

En Samfylkingin verður að sjálfsögðu líka að axla sína ábyrgð. Ef þingmenn Samfylkingarinnar halda að þeir séu stikkfrí eftir tæplega tveggja ára stjórnarsetu þá eru þeir á miklum villigötum.

Mikilla tíðinda að vænta

En þjóðin virðist vilja ...

Þetta er örugglega rétt hjá forsætisráðherra. Það er ábyrgðarleysi að kjósa við núverandi aðstæður. En þjóðin virðist vilja kosningar samt. Og verður þjóðin ekki bara að fá það sem hún vill? Þjóðin er að undirgangast þungar byrðar vegna þess sem gerst hefur. Ótímabærar kosningar munu hugsanlega auka það sem axla þarf ábyrgð á af hálfu þjóðarinnar. Ég held að þjóðin sé nægilega skynsöm að átta sig á þessu. Kannski finnst þjóðinni einfaldlega að það sé lítil viðbót að bera?

Það eru takmörk fyrir því hvað stjórnmálamenn geta gengið langt í því að hafa vit fyrir þjóðinni. Að þeim mörkum er nú komið að minni hyggju. Nú verða stjórnmálamenn að svara kallinu og leyfa þjóðinni að kjósa. Jafnvel þótt sumum okkar finnist í því engin skynsemi. Hefur þjóðin ekki leyfi til að taka óskynsamlegar ákvarðanir? Nóg af þeim hafa aðrir tekið á síðustu mánuðum og misserum.

Ábyrgðarleysi að leysa upp stjórnina

Ég skil mótmælendur en ...

af hverju láta mótmælendur skiljanlega og jafnvel réttláta reiði sína gagnvart stjórnvöldum bitna á lögreglumönnum? Ég hef skilið mótmælendur svo að þeirra mótmæli beinist gegn því að engin hafi axlað ábyrgð á hruninu. Bankastjórn Seðlabankans sitji enn, stjórnendur FME sitji enn, ríkisstjórnin sitji enn. Af hverju láta mótmælendur reiði sína útaf þessu bitna á lögreglumönnum?  

Lögreglumenn eru almennir borgarar eins og mótmælendurnir sjálfir. Þeir eru að sinna störfum sínum og eru ekki öfundsverðir af sínu hlutskipti. Þeir teljast ekki til hálaunastéttar hvað þá stéttar sem þegið hefur ofurlaun. Lögreglan hefur í öllum sínum störfum í mótmælunum fetað af mikilli skynsemi þetta einstigi sem þarf að feta. Sjálfsagt eru til einhver dæmi um annað, en meginregluna tel ég skýrt vera þá að lögreglan hefur veitt mótmælendum mikið svigrúm til að mótmæla, þó lína hafi verið dregin við eignaspjöll. Ég leyfi mér að lýsa því sem minni skoðun að lögreglan er búin að standa sig frábærlega vel.

Ég hvet mótmælendur til að hætta að láta reiði sína bitna á lögreglunni. Hún er bara að sinna vinnunni sinni. Hún ber ekki ábyrgð á því sem mótmælendur telja sig vera að mótmæla.

Viðbót:

Vegna frétta um harðræði lögreglu gegn mótmælendum þá hvet ég þá sem telja sig hafa orðið fyrir slíku harðræði að kæra atvikin til lögreglu. Það er óþolandi ef þessar fréttir eru réttar og það er jafn óþolandi fyrir lögregluna að sitja undir þessum ásökunum.

Mótmælt við þinghúsið á ný

Held

að þetta sé hárrétt mat hjá varaformanni Samfylkingarinnar. Hvort sem það er skynsamlegt eða ekki þá vill þjóðin kosningar. Ég held að undan þeirri kröfu verði ekki lengur vikist. 

Óhjákvæmilegt að kjósa í vor