Ég skil mótmælendur en ...

af hverju láta mótmælendur skiljanlega og jafnvel réttláta reiði sína gagnvart stjórnvöldum bitna á lögreglumönnum? Ég hef skilið mótmælendur svo að þeirra mótmæli beinist gegn því að engin hafi axlað ábyrgð á hruninu. Bankastjórn Seðlabankans sitji enn, stjórnendur FME sitji enn, ríkisstjórnin sitji enn. Af hverju láta mótmælendur reiði sína útaf þessu bitna á lögreglumönnum?  

Lögreglumenn eru almennir borgarar eins og mótmælendurnir sjálfir. Þeir eru að sinna störfum sínum og eru ekki öfundsverðir af sínu hlutskipti. Þeir teljast ekki til hálaunastéttar hvað þá stéttar sem þegið hefur ofurlaun. Lögreglan hefur í öllum sínum störfum í mótmælunum fetað af mikilli skynsemi þetta einstigi sem þarf að feta. Sjálfsagt eru til einhver dæmi um annað, en meginregluna tel ég skýrt vera þá að lögreglan hefur veitt mótmælendum mikið svigrúm til að mótmæla, þó lína hafi verið dregin við eignaspjöll. Ég leyfi mér að lýsa því sem minni skoðun að lögreglan er búin að standa sig frábærlega vel.

Ég hvet mótmælendur til að hætta að láta reiði sína bitna á lögreglunni. Hún er bara að sinna vinnunni sinni. Hún ber ekki ábyrgð á því sem mótmælendur telja sig vera að mótmæla.

Viðbót:

Vegna frétta um harðræði lögreglu gegn mótmælendum þá hvet ég þá sem telja sig hafa orðið fyrir slíku harðræði að kæra atvikin til lögreglu. Það er óþolandi ef þessar fréttir eru réttar og það er jafn óþolandi fyrir lögregluna að sitja undir þessum ásökunum.

Mótmælt við þinghúsið á ný

Athugasemdir

[Sigurður Þór Guðjónsson, 21.1.2009 kl. 17:38]

Láttu ekki svona. Í morgun fundaði forsætisráðherra meðlögreglunni og hefur áreiðanlega lagt á ráðin um það hvenrig eigiað brjóta mótmælin á bak aftur. Það er það sem er í uppsiglingu. Að brjóta mótmæli almennings á bak aftur með valdi og ofbeldi - engar kosningar. Við þær aðstæður sem nú ríkja er lögreglan varnarskjöldur ríkisstjórnarinnar og menn eiga að líta á hana sem slíka.

[Helena (IP-tala skráð) 21.1.2009 kl. 17:46]

Það er lögreglan sem er sett í þessa niðurlægjandi aðstöðu að þurfa að verja valdnýðslu og stærsta bankarán sögunnar,

lögreglan liggur ekki undir árásum, henni er beint á milli okkar,

í dag var í kring um alþingishúsið raðað upp lögregluþjónum í óeirðarbúningum og inní óeirðarbúningunum voru litlar löggustelpur á milli tvítugs og þrítugs, einhverjar örugglega komnar yfir fimmtugt, ungir strákar og gamlir menn,

sumir stóðu náttúrulega undir því að vera óeirðarlögreglumenn en ekki margir

Hvað finnst þér um að ríkistjórnin verji sig með litlum stelpum?

[Jón (IP-tala skráð) 21.1.2009 kl. 17:50]

Sigurður; ertu 12 ára? Ef styrkur ríkisstjórnar markast af hæfni lögreglunnar til þess að verja lýðræðislega kosið fólk gegn ofbeldi, tja þá þurfum við greinilega að koma okkur upp mun sterkari lögreglu sem getur sinnt þessari skyldu sinni. Heygaflalýðræði er ekki neinum til góðs utan óeirðaseggja.

[Kristleifur Þorsteinsson (IP-tala skráð) 21.1.2009 kl. 21:36]

Lögreglan er holdgervingur framkvældavalds ríkisstjórnarinnar. Lögreglumenn kjósa að vera lögreglumenn, og enginn neyðir þá til þess. 

Ég hef verið á þessu mótmælum síðan klukkan eitt í dag, og ekkert, bókstaflega ekkert, ofbeldi hefur beinst gegn lögreglu. Þeir einu sem hafa lent í einhverju aðkasti eru óeirðarlögreglan sem stendur vörð fyrir framan alþingishúsið, og þá aðalega í eggjum og skyri. Þó það sé vissulega ekki geðslegt að fá yfir sig skyr og egg, getur það varla talist ofbeldi þegar viðkomandi er klæddur í þykkan hlífðargalla, með skjöld, og hjálm með plötu fyrir andlit. 

Lögreglumenn hafa gengið á milli mótmælenda í allan dag. Geir Jón lögreglustjóri var á vappi að spjalla við fólk á afar vinalegann máta fyrripartinn.