Síðasti vetrardagur

Mér brá þegar ég gekk útúr dómsal 102 í Héraðsdómi Reykjavíkur um kl. 14:30 í dag. Út um gluggann í afgreiðslunni blöstu við blikkandi ljós, lögreglubíll, slökkviliðsbíll og þykkan reyk lagði upp af húsinu þar sem skemmtistaðurinn Pravda er. Við nánari athugun kom í ljós að kveiknað hafði í húsunum þarna sunnan megin við Austurstrætið. Búið var að loka af Lækjartorg og fjöldi manns fylgdist með. Reykurinn var svo þykkur að ekkert sást sunnar en Iðuhúsið og varla það. Þar sem mín beið viðtal á skrifstofunni gat ég ekki gefið mér tíma til að fylgjast lengi með en augljóst var að allt stefndi í stórtjón á þessum gömlu húsum í hjarta Reykjavíkur.

Í kvöld fórum við vinkonurnar svo út að borða, sem er ekki í frásögur færandi. Við ákváðum að fara niður á Laugaveg og ganga niðrí bæ til að sjá hvernig umhorfs væri þar eftir brunann. Bílnum ákvað ég að leggja á Vitastíg. Þegar ég beygði af Hverfisgötunni upp Vitastíginn var allt í reyk á horninu við Laugaveg. Mín fyrsta hugsun var hvort annar eldur hefði kviknað í miðbænum. Við nánari athugun kom í ljós að svo var ekki, sem betur fer. Reykurinn var gufa. Heitt vatn rann í stríðum straumum niður Vitastíginn og var búið að mynda stórt og mikið stöðuvatn, sjóðandi heitt auðvitað, á gatnamótum Laugavegar og Vitastígs.

Við stöllur héldum áfram göngunni niður Laugarveginn og niður í miðbæ. Þar var auðvitað hræðilegt að sjá eyðileggingu eldsins. Talsverður mannfjöldi var, gangandi og akandi, í sömu erindagjörðum og við, að kynna sér stöðu mála.

Gufan grúfði enn yfir horni Vitastígs og Laugavegar þegar við komum tilbaka. Búið var að loka Laugaveginum en enn rann heitavatnið. Viðgerðarmenn voru mættir á staðinn.

Þessi síðasti vetrardagur verður eftirminnilegur.

Þjóðargjöfin og vika bókarinnar

Vika bókarinnar á vegum Félags íslenskra bókaútgefenda hófst í dag, 17. apríl. Að þessu sinni ákváðu bókaútgefendur að bjóða frambjóðendum til Alþingiskosninga, sem skráðir eru fyrir bók í Gegni að koma til opnunarinnar í bókabúð Máls og menningar. Rit mitt um Aldraða á Íslandi frá árinu 1987 hefur ratað í Gegni og þar með telst ég bókarhöfundur skv. skilgreiningu.

Ég var nú hálffeimin að mæta þarna með viðurkenndum rithöfundum, eins og meðframbjóðanda mínum, Stefáni Mána, sem skipar 16. sæti í Reykjavík suður. En þetta var gaman og þjóðargjöf bókaútgefenda til mín notaði ég til að kaupa þrjár kiljur, Skipið eftir Stefán Mána (að sjálfsögðu), Sá yðar sem syndlaus er eftir Ævar Örn Jósepsson og Viltu vinna milljarð sem ég hef mikið heyrt talað um. Ljóst er að annir framundan munu ekki flýta fyrir því að þessar bækur verði lesnar, en þær bíða þá sumarfrísins.

Vika bókarinnar er frábært framtak og vonandi munu sem flestir foreldrar leysa ávísunina út og kaupa bækur fyrir börnin sín og sig sjálfa. Glitnir styður þessa þjóðargjöf og er sá stuðningur lofs verður.

Kosningabaráttan er hafin

Fyrstu fundir kosningabaráttunnar voru í gær. Ég mætti ásamt menntamálaráðherra og Sigurði Kára á hádegisfund hjá Bandalagi íslenskra listamanna. Þá langaði til að heyra um áherslur Sjálfstæðisflokksins í menningarmálum. Landsfundurinn samþykkti metnaðarfulla ályktun á þessu sviði sem ánægjulegt var að skýra þeim frá. Þar er áhersla lögð á að hlutverk hins opinbera eigi fyrst og fremst að vera að skapa gróskumikinn jarðveg fyrir menningarstarfsemi og að opinber stuðningur við lista- og menningarstarfsemi, eins og aðrar atvinnugreinar eigi ævinlega að vera gegnsær.

Umræður var ekki hægt að skilja með öðrum hætti en þeim að fulltrúar BÍL séu í meginatriðum ánægðir með það starf sem unnið hefur verið í menningarmálum á undangegnum árum, undir forystu Sjálfstæðisflokksins. En auðvitað hafa þeir, eins og öll hagsmunasamtök, áhuga á að sjá meira gert. Á þær óskir hlustuðum við, en lofuðum engu.

Kl. 17 var ég viðstödd opnun fyrstu kosningaskrifstofunnar, uppi í Árbæ. Hún er fyrir Árbæjar- og Grafarholtshverfið. Fjölmenni var við opnunina og greinilegt að þarna verður unnið af krafti næstu vikurnar.

Glæsilegur landsfundur

Glæsilegur landsfundur Sjálfstæðisflokksins er að baki. Stemningin var frábær og baráttuhugur í öllum. Við væntum góðra úrslita úr kjörkössunum 12. maí nk.

Málefnavinnan gekk vel. Ég sat fundi í velferðarnefnd og fjölskyldunefnd og leit stutt við í nefnd um málefni aldraðra. Fjörug skoðanaskipti voru í öllum nefndum og fundirnir vel sóttir.

Á sunnudag kom í ljós, eins og vænta mátti, að forysta flokksins nýtur víðtæks stuðnings. Það var ánægjulegt og er gott veganesti í þá kosningabaráttu sem framundan er.