"Hann situr hjá"

Það er greinilegt að nýkjörinn oddviti VG í komandi borgarstjórnarkosningum telur sig ráða hvernig aðrir fulltrúar VG neyta atkvæðisréttar síns í atkvæðagreiðslum í borgarstjórn. Og skirrist ekki við, í hita augnabliksins, að segja frá því opinberlega þegar í ljós kemur að varaborgarfulltrúi hefur annan og eigin vilja. Þessi uppákoma er sérkennileg birtingarmynd þess "lýðræðislega þjóðskipulags" sem VG segist í stefnuskrá sinni vilja berjast fyrir.

Hermann studdi Ólaf

Það er rétt ...

að það er hlutverk dómstóla en ekki banka að dæma þá sem kunna að hafa gerst brotlegir við lög í aðdraganda hrunsins.

En er það sérstakt hlutverk bankanna að umbuna sumum umfram aðra?

Vinnan aldrei unnin þannig að öllum líki

Mun hagur almennings vænkast með hlutabréfakaupum í Högum?

Arion banki hefur lengi vandræðast með Haga. Haga keyptu Baugsfeðgar útúr Baugi, korteri fyrir hrun, með ríflegri lánsfyrirgreiðslu forvera Arion banka. Lending hefur náðst. Gefa á ,,almenningi og fagfjárfestum" kost á að kaupa hlutabréf í Högum í opnu hlutafjárútboði. Stjórnendur verða hinir sömu og ,,stjórnendateymið" fær að kaupa sinn skerf.

Með fagfjárfestum er væntanlega fyrst og fremst átt við lífeyrissjóðina. Þeir töpuðu miklum fjármunum í hruninu. Eigendur lífeyrissjóðanna, almenningur í landinu, geldur fyrir með lakari lífeyri þegar þar að kemur. Sjálfsagt mun sagan ekki stöðva lífeyrissjóðina í að fjárfesta í Högum, enda almenningur í landinu sem borgar brúsann, ef illa fer.

Víkjum þá að almenningi í landinu, sem stjórn Arion banka vill að kaupi hlutabréf í Högum. Er til almenningur í landinu sem a) á fjármuni til að fjárfesta í hlutabréfum, b) treystir hlutabréfamarkaðnum á Íslandi svo vel að hann setji hugsanlegar krónur til sparnaðar í kaup á hlutabréfum?

Almenningur í landinu tók áskorun stjórnvalda við stofnun hlutabréfamarkaðar á Íslandi á tíunda áratug síðustu aldar. Almenningur setti sparnað sinn í hlutabréf í félögum á markaði, enda treysti almenningur því að þar giltu leikreglur, sem farið væri eftir. Í hruninu kom annað í ljós. Almenningur í landinu tapaði milljörðum króna á hruni bankanna. Tæpast hvetur sú reynsla almenning í landinu til að hlaupa til og kaupa hlutabréf.  

Hér varð hrun, sem almenningur bar sáralitla ef nokkra ábyrgð á. Afleiðingarnar ber almenningur þó af fullum þunga með versnandi lífskjörum, stóraukinni greiðslubyrði, m.a. af íbúðalánum og sívaxandi skattheimtu. Almenningi var lofað skjaldborg, sem hvergi mótar fyrir.  En nú skal bjóða almenningi upp í nýjan hlutabréfadans. Það á ekki af almenningi á Íslandi að ganga.

Hagar í Kauphöllina

Stundum

veltir maður fyrir sér hvort einstakar stéttir hafi ekki fylgst með þróun atvinnulífs og atvinnustigs síðustu mánuðina ...

Flugmenn samþykkja verkfall

Haggis er ljúffengt :-)

Í fyrra skoruðu góðir vinir, sem margsinnis hafa farið á Burns Supper, á mig og fleiri að drífa okkur með. Áskoruninni var tekið. Þetta var hreint frábært kvöld. Maturinn afbragðsgóður. Haggis er nefnilega ljúffengt og gott og bráðhollt (held ég). Viskýið er ég minna fyrir. Kannski smakkast það betur þegar því er hellt svona yfir haggisið. Prufa það í kvöld. 

Haggis og viský í aðalhlutverki

Óttalega

er það ósmekklegt af "vinum" okkar og frændum Norðmönnum að tala svona um okkur.

Fátæka Ísland fyrst til Haítí

Endurskoðunar þörf?

Það er frábært og gott að umbuna þeim einstaklingum sem ná þeim áfanga að verða stórmeistarar í skák. En af fréttinni verður ekki annað ráðið en að full ástæða sé til að endurskoða þær reglur sem nú gilda, krefjast skilgreinds vinnuframlags af þeim sem launanna njóta sem og virkni við skákiðkun. Á tímum alvarlegs niðurskurðar á ríkisútgjöldum hlýtur að þurfa að huga að þessum kostnaðarlið eins og fjölmörgum öðrum.

Óskýrar reglur um laun stórmeistara

Um hvað snýst þjóðaratkvæðagreiðslan?

Einstakir þingmenn Samfylkingarinnar sega þjóðaratkvæðagreiðsluna snúast um ríkisstjórnina eða forsetann. Annað hvort ríkisstjórnin eða forsetinn verði að víkja að henni lokinni. Nú slæst formaður Sjálfstæðisflokksins í þennan hóp og segir þjóðaratkvæðagreiðsluna snúast í víðu samhengi um líf ríkisstjórnarinnar. Er einhver ástæða til að nálgast málið með þessum hætti? Atkvæðagreiðslan snýst um framtíð Íslands, að gera okkur kleift að standa við hugsanlegar lagalegar skuldbindingar, með þeim hætti að við fáum undir skuldbindingunum risið. 

Ríkisstjórnin, með réttu eða röngu, taldi sér ekki annað fært en að knýja Icesave frumvörpin í gegn, fyrst hið fyrra og svo hið síðara, eftir að fyrirvarar Alþingis í hinu fyrra fengu ekki náð fyrir augum viðsemjendanna. Ýmislegt bendir til að betur hefði mátt halda á þessu Icesave máli. Fá teikn eru þó á lofti um að stjórnarandstaðan, hefði hún verið á valdastólum, hefði haldið betur á því. Í því sambandi má m.a. benda á að þingsályktunin, sem samþykkt var 5. desember 2008, sem heimilaði stjórnvöldum að ganga til samninga við Breta og Hollendinga um Icesave, var stutt og laggóð, svohljóðandi:

Alþingi ályktar að fela ríkisstjórninni að leiða til lykta samninga við viðeigandi stjórnvöld vegna innstæðna í útibúum íslenskra viðskiptabanka á Evrópska efnahagssvæðinu á grundvelli þeirra sameiginlegu viðmiða sem aðilar hafa komið sér saman um.

Ekki er mikið um fyrirmæli til samninganefndarinnar eða kröfur um hvernig skyldi semja eða ekki semja. Vissulega er vísað í að semja skuli á grundvelli þeirra sameiginlegu viðmiða sem aðilar hafi komið sér saman um. Og hver voru þau? Í fylgiskjali með þingsályktunartillögunni segir eftirfarandi undir fyrirsögninni: Umsamin viðmið:

1.      Ríkisstjórn Íslands hefur átt viðræðufundi með stofnunum Evrópusambandsins og hlutaðeigandi aðildarríkjum þess um skuldbindingar Íslands samkvæmt samningnum um Evrópska efnahagssvæðið að því er tekur til tilskipunar um innstæðutryggingar 94/19/ EBE. Aðilar komu sér saman um að tilskipunin um innstæðutryggingar hafi verið felld inn í löggjöfina um Evrópska efnahagssvæðið í samræmi við samninginn um Evrópska efnahagssvæðið og gildi því á Íslandi með sama hætti og hún gildir í aðildarríkjum Evrópusambandsins.
    2.      Viðurkenning allra aðila á þessari lagalegu stöðu greiðir fyrir skjótri niðurstöðu samningaviðræðna þeirra sem nú standa yfir um fjárhagsaðstoð við Ísland, þ.m.t. við Alþjóðagjaldeyrissjóðinn. Þessar samningaviðræður skulu fara fram með samhæfðum og samræmdum hætti og skal þar tekið tillit til hinna erfiðu og fordæmislausu aðstæðna sem Ísland er í og knýjandi nauðsynjar þess að ákveða ráðstafanir sem gera Íslandi kleift að endurreisa fjármála- og efnahagskerfi sitt.
    3.      Stofnanir Evrópusambandsins og Evrópska efnahagssvæðisins munu taka áframhaldandi þátt í þessu ferli sem fer fram í samráði við þær.

Sú ríkisstjórn sem sat í desember 2008 og raunar sú stjórnarandstaða sem þá var á Alþingi sá ekki ástæðu til að nesta samninganefndina betur en að framan greinir og alls ekki með öllum þeim fyrirvörum sem sem síðan voru af hálfu Alþingis settir í frumvarpið sumarið 2009.

Þjóðin er orðin langleið á þeim sandkassaleik sem henni hefur verið boðið upp á í sölum Alþingis við umfjöllun Icesave frumvarpanna. Nú þarf stjórn og stjórnarandstaða að snúa bökum saman og finna lausn sem lýkur þessu máli.

Margt jákvætt hefur verið sagt í hinni erlendu pressu á síðustu dögum. Ýmsir hafa talað okkar máli erlendis og svo virðist sem skilningur á okkar sjónarmiðum sé að aukast. Þennan meðbyr þarf að nýta og það tekst best ef allir leggjast á eitt, stjórn og stjórnarandstaða. Það verður ekki gert með því að tala fyrir því að kosningarnar snúist um eitthvað annað en afstöðuna til Icesave laganna.

Bjarni: Snýst um líf ríkisstjórnarinnar

Jákvætt

Það hlýtur að vera jákvætt að stjórn og stjórnarandstaða skuli loksins vera farin að tala saman um sameiginlega aðkomu að Icesave málinu, í þeirri stöðu sem það er komið í núna, eftir synjun forseta Íslands á frumvarpinu.

Það hafa komið upp nýir fletir á þessu máli, ekki síst eftir áhugaverð viðtöl í Silfri Egils í gær. Nú skiptir máli að stjórn og stjórnarandstaða snúi bökum saman í þágu Íslands í þessu máli, nýti sér þann meðbyr sem okkar málstaður virðist njóta og fái hagstæðari lausn en þá sem fyrir liggur.

Mjög gott skref

Það er ekki vinalaus þjóð ...

sem á jafn öflugan og beinskeyttan málsvara og Evu Joly.

Joly harðorð í garð Hollendinga