Slæmt mál

Líklega á eftir að reyna á það hvort Hæstiréttur staðfesti þessa niðurstöðu Héraðsdóms Reykjavíkur. Það er afar slæmt mál ef Alþingi hefur sett lög sem brjóta gegn stjórnarskránni. Enn verra er, ef rétt er, að einn löglærður þingmaður hafi sérstaklega aðvarað forseta Alþingis og fengið þau svör að ríkisstjórnin krefðist þess að frumvarpið væri samþykkt óbreytt.

Lögin gegn stjórnarskrá

Vitur eftir á ...

Það er alltaf auðvelt að vera vitur eftir á. En engu að síður bendir alltof margt  til þess að íslensk yfirvöld hafi vitað og gert sér grein fyrir að staða mála væri slæm alveg frá því í ársbyrjun 2008. Í stað þess að grípa til aðgerða virðist hið dæmigerða íslenska viðhorf "Þetta reddast" hafa ráðið för. Til ómælds tjón fyrir fólkið og fyrirtækin reddaðist það ekki.

Veðjuðu á endurlífgun hagkerfisins

Hjónaerjur ...

Þetta er nú bara vandræðalegt fyrir forsetaembættið. Ef rétt er eftir haft um þetta viðtal og þann kvöldverð sem vísað er til þá sýnist mér að forsetinn þurfi að láta prótókollmeistara sína aðeins ræða við forsetafrúnna.

Dorrit segist lengi hafa varað við fjármálahruni

Skiptar skoðanir ...

Það er greinilegt að menn horfa misjafnlega á stöðu bankastjórnar Seðlabankans. Sjálf segist hún engin mistök hafa gert. Aðilar sem horfa á framvindu mála hér á landi frá útlöndum fullyrða að fjölmörg mistök hafi verið gerð.

Ekki treysti ég mér til að dæma um hvort bankastjórn Seðlabankans hafi gert mistök eða ekki. Það er eitt af því sem verið er að rannsaka t.d. af rannsóknanefnd Alþingis. En kjarni málsins er sá að með réttu eða röngu er bankastjórn Seðlabankans rúin trausti, innanlands og á alþjóðlegum vettvangi. Það vantraust kann að vera ósanngjarnt í hennar garð en það er engu að síður staðreyndin. Eins og rifjað hefur verið upp kom upp fyrir nokkrum árum að bankastjórn Landsbankans naut ekki lengur trúverðugleika og trausts meðal almennings. Forsætisráðherrann þá þrýsti á bankastjórnina til að segja af sér og sagði:

"Þinginu og þjóðinni er núna mikilvægast að friður og traust fái að ríkja um Landsbankann á ný, jafnt inn á við sem út á við."..."Landsbankinn er ein mikilvægasta fjármálastofnun landsins og orðspor okkar út á við og inn á við krefst þess að skapað sé traust og friður um bankann. " 

Það er sérkennileg kaldhæðni örlaganna að forsætisráðherrann þá er nú einn þeirra einstaklinga sem skipa bankastjórn Seðlabankans. Forsætisráðherra hefur þrýst á þessa bankastjórn að segja af sér. Einn bankastjóranna hefur brugðist við og beðist lausnar. Hinir sitja enn, m.a. fv. forsætisráðherra sem fannst svo sjálfsagt að önnur bankastjórn segði af sér við svipaðar kringumstæður.

Christensen: Neyðarlegt að Davíð segi ekki af sér

Skelfilegt

Það er þyngra en tárum taki að lesa um hræðilegar afleiðingar skógareldanna sem geisa í Ástralíu. Manntjón og gífurlegt eignartjón. Ógnvænlegast af öllu er að einhverjir brunavargar skuli hugsanlega hafa átt sök á upptökum einhverra þessara mannskæðu elda og þar með í raun bera ábyrgð á dauða fjölda manna. Það er óskiljanlegt hvernig nokkrum dettur í hug að gera svona lagað.

Yfir 130 látnir í Ástralíu

Skýringa er þörf ....

Í hádegisfréttum RÚV var skýrt frá því að stjórnarformaður Baugs myndi þiggja umtalsverð laun á mánuði fyrir þessa stjórnarsetur, auk hlunninda. Í kvöldfréttum bar stjórnarformaðurinn þær fullyrðingar tilbaka og sagði þóknanir sínar miklu lægri og hlunnindin engin. 

Eftir stendur spurningin: Af hverju treystir skilanefnd Landsbankann þessum einstaklingum til að sitja áfram í þessum stjórnum? Er ekki fullt af fólki sem gæti tekið þessi verkefni að sér? 

Ég fullyrði að fólkinu í landinu ofbýður þessi ákvörðun skilanefndar Landsbankans. Ríkisstjórnin situr uppi með að þetta gerist á hennar vakt, vakt ríkistjórnar fólksins í landinu. Er ríkisstjórnin, eftir einungis viku við völd, hætt að hlusta á grasrótina sem hún sótti vald sitt til?

Jón Ásgeir og Gunnar áfram í stjórnum

Er eitthvað ...

ókarlmannlegt við það að dansa þegar spiluð eru ABBA-lög? Mér finnst það nú bara sýna að það er lífsmark með forsetanum ef hann gat ekki stillt sig um að dansa þegar spilað var Super Trouper og Mamma Mia. Eru talsmenn forsetans ekki búnir að átta sig á því að Pierce Brosnan, sem leikið hefur karlmannlegasta hlutverkið af þeim öllum, sjálfan James Bond - 007, lék í Mamma Mia? Og söng meira að segja í myndinni. Ekki sýnist mér það hafa skaðað karlmennskulega ímynd Pierce Brosnan, nema síður væri.

Pútín neitar ABBA-dansi

Fyndið ...

Daman segir að starf hennar hafi falist í að finna nýjar stúlkur til þess að pósa naktar í Playboy. Hún sagði upp störfum því "starfið hafa verið orðið mjög einhæft". Var það þá ekki einhæft frá upphafi?

Kanínulífið orðið vandræðalegt

Mörgu komið í verk ...

Stjórn fólksins í landinu, eins og forsætisráðherra hefur skírt ríkisstjórn sína, sýnist hafa komið ýmsu í verk þessa fyrstu viku sem hún er búin að vera við völd. Vissulega er maður ekkert endilega sammála öllu því sem gert hefur verið en aðgerðarlaus hefur stjórnin ekki setið. 

Forsætisráðherra lætur verkin tala, eins og hún lofaði. Kjósendur munu því fá tækifæri til að dæma hana og þá flokka sem að ríkisstjórninni standa af verkunum 25. apríl nk.

Undirbúa stjórnlagafrumvarp

Hvað skal gera?

Þetta kallar á að ákveða hvort maður skelli sér í þennan slag aftur ...

Prófkjör um miðjan mars