Kom, sá og sigraði ...

Það er greinilegt að Framsóknarflokkurinn ætlar að skapa sér nýja ásýnd. Sigmundur Davíð gekk ekki í Framsóknarflokkinn fyrr en í lok síðasta árs. Engu að síður er hann með nokkuð afgerandi hætti kosinn til æðsta embættis í flokknum. Þetta segir talsvert um álit framsóknarmanna á Sigmundi Davíð. Sigmundur Davíð getur ekki annað en verið ánægður með það og stoltur af því. En kannski segir niðurstaðan ennþá meira um álit framsóknarmanna á öðrum sem í framboði voru til formanns?

Sigmundi Davíð Gunnlaugssyni fylgja góðar óskir í því vandasama starfi sem hann nú tekur að sér. Það verður áhugavert að fylgjast með hvernig honum gengur á þessum nýja vettvangi og hvort honum takist að endurvekja traust á þeim flokki.

Sigmundur kjörinn formaður

Miklar væntingar

Bandaríkjamenn hafa miklar væntingar til Obama og greinilega treysta því að honum auðnist að snúa mörgum málum á heimavelli til betri vegar. Það verður spennandi að fylgjast með fyrstu 100 dögunum í forsetatíð Obama. Þeir munu örugglega að einhverju leyti svara því hvort honum takist að standa undir væntingum. Og framhjá því verður ekki litið að alt umhverfið er Obama sérlega andsnúið og er þá vísað fyrst og fremst til efnahagsástandsins í heiminum. Hann er ekki öfundsverður af þeim verkefnum sem hann er nú að taka að sér.

Obama í stjörnufans

Fortíðarvandi?

Það sýnist óvænt að Páll Magnússon skuli ekki ná í aðra umferð. Hafa náin tengsl hans við eldri forystu og það sem ýmsum finnst að hún beri ábyrgð á, orðið honum fjötur um fót? Einhvern veginn sýnist það nærtækasta skýringin.

Höskuldur og Sigmundur áfram

Það var og ...

Kannski ekki alveg óvænt niðurstaða eftir það sem á undan var gengið hjá Kjararáði. Forseti Íslands hlýtur næst að skrifa fjármálaráðherra bréf og afsala sér hluta launa sinna, tímabundið eða varanlega. Það er eðlilegt næsta skref hjá honum.

Kjararáð getur ekki lækkað laun forsetans

Glerþak?

Maður verður hálf þunglyndur að lesa þessar tölur. Þær breytast nánast ekkert. Og árin líða. ...

Ég hef nokkrum sinnum bloggað um þessi mál, sérstaklega hlutfall kvenna í nefndum hjá hinu opinbera. Ráðherrum, sem skipa nefndir, er í lófa lagið að gæta þess að hlutföll kynjanna í nefndunum sé jafnt. Vilji er allt sem þarf. Athafnir í stað orða. Ég held að margir séu farnir að bíða eftir því á þessu sviði. A.m.k. konur. Og ég leyfi mér að efast um að eitthvað jafnréttisþing skili nokkru.

Mikill meirihluti forstöðumanna ríkisstofnana karlar

Eru lífeyrissjóðirnir ekki búnir að tapa nóg?

Eru þetta skynsamlegar hugmyndir? Flestir héldu að bankarnir væru örugg fjárfesting, enda áttu lífeyrissjóðirnir flestir mikið í þeim. Allt er það nú glatað og eigendur fjár í lífeyrissjóðum umtalsverðum fjárhæðum fátækari. Í fréttinni segir:

Ætlunin er að fjárfesta í fyrirtækjum sem eru fjárhagslega illa sett en með álitlega rekstrarstöðu og skila þeim áfram þannig að þau geti orðið sterkur hlekkur í íslensku atvinnulífi. Fjárfestingar sjóðsins ráðast af væntanlegri arðsemi fjárfestinganna. Ekki verður gerður greinarmunur á fyrirtækjum eftir atvinnugreinum.

Hljómar vel. En hvað gerist ef mistök verða við mat á væntanlegri arðsemi? Þá eru það hvorki SA né ASÍ sem sitja uppi með það tap heldur lífeyriseigendur. Flestir eru þeir skattgreiðendur líka og á leiðinni til þeirra eru sennilega háir reikningar vegna óhugnanlegrar skuldastöðu ríkissjóðs, sem gerir ekkert nema að versna næstu misseri.

Eigum við ekki bara að leyfa lífeyrissjóðunum að vera í friði, setja þá fjármuni sem þar eru og safnast í þá næstu árin, í örugga ávöxtun og taka ekki frekari áhættu með þá?

75 milljarða fjárfestingargeta

Það verður

áhugavert að fylgjast með þessu flokksþingi framsóknarmanna í fjölmiðlum og ekki síður hvort nýrri forystu takist að hala flokkinn eitthvað upp úr þeirri niðurlægingu sem hann hefur verið í núna um margra missera skeið. Ný forysta mun hafa nóg að gera við að reyna að endurreisa flokkinn. Spurning er hvort lífi sé hægt að blása í öldunginn.

Flokksþing breytinganna

Góðar óskir

Vonandi gengur allt að óskum hjá utanríkisráðherra í þeirri meðferð sem hún er í ytra og að frekari sýnataka sé einvörðungu merki um að læknar þar vilja fara varlega, en ekki að eitthvað óvænt hafi komið upp. Við þurfum hana hingað heim til starfa sem fyrst. En heilsan gengur að sjálfsögðu fyrir. Ég sendi utanríkisráðherra hugheilar óskir um góðan bata.

Ingibjörg Sólrún lengur frá en áður var talið

Lá alltaf fyrir

Þetta kemur nú ekki mikið á óvart. En mér finnst áhugaverður þessi ferill, sem útnefningar ráðherra og raunar t.d. hæstaréttardómara, fara í gegnum. Þeir sem tilnefndir eru til ábyrgðarmikilla embætta í Bandaríkjunum þurfa að sýna að þeir séu traustsins verðir. Kannski við gætum lært eitthvað af þessu?

Clinton hlýtur samþykkti utanríkismálanefndar

Tákn og minnisvarði

Held að segja megi að þessi háhýsi um allan bæ séu séu tákn góðærisins og minnisvarðar hrunsins. Turninn við Borgartúnið er óskiljanlegur. Hann passar engan veginn í umhverfið. Það hefði aldrei átt að leyfa þessa byggingu á þessum stað. Og það er rétt, ámátlegt er ýlfrið sem berst um allt hverfið þegar vindurinn gnauðar í gegnum hann. Það vonandi þó hverfur þegar hann er fullglerjaður. Vonandi verða hinir tveir turnarnir, sem búið var að veita leyfi fyrir, aldrei reistir. Turninn við Borgartúnið er varanlegur minnisvarði slæma skipulagsmistaka borgaryfirvalda. Fleiri slík minnismerki, frá eldri tímum, eru útum allan bæ.

Táknmynd góðæris eða kreppu