Gyllt rós

Það var góð stund í hádeginu í Alþingishúsinu þegar við nokkrar Zontakonur frá Reykjavík og Hafnarfirði festum í alþingismenn gyllta rósarnælu. Þessa nælu ætlum við að selja um helgina í helstu verslunarkjörnum á Reykjavíkursvæðinu. Zontaklúbbar á Selfossi, Akureyri og Ísafirði selja í sinni heimabyggð. Allur ágóði af sölu rósarnælunnar rennur til starfsemi Stígamóta í þjónustuverkefnið "Stígamót á staðinn" og til systursamtaka Stígamóta úti á landi.

Fyrir þá sem ekki vita þá er Zonta alheimsamtök kvenna í ýmsum störfum sem hafa það að leiðarljósi að bæta lagalega og stjórnmálalega stöðu kenna og auka réttindi kvenna til menntunar og betra heilbrigðis hvar sem er í heiminum (sjá hér). Zontasamtökin styðja hjálparstarf í þágu kvenna og barna bæði í heimabyggð og á alþjóðlegum vettvangi. Flest alþjóðleg verkefni Zonta eru unnin í samvinnu við UNIFEM eða UNICEF. Á Íslandi eru Zontaklúbbarnir sjö talsins, tveir í Reykjavík, einn í Hafnarfirði, einn á Selfossi, tveir á Akureyri og einn á Ísafirði.

Ég vona að sem flestir sem hitta okkur Zontakonur um helgina kaupi af okkur næluna sem er hin fallegasta og styrki um leið þarft málefni.

Athugasemdir

[Ragnheiður , 6.3.2008 kl. 12:47]

Þessi næla er bráðfalleg, ég ætla að reyna að "rekast" á Zontakonu til að kaupa mér eina.

Takk fyrir ábendinguna

[Sonja (IP-tala skráð) 6.3.2008 kl. 17:52]

Hvar hittir maður Zontakonur?

[Dísa Dóra, 6.3.2008 kl. 21:50]

Ég ætla mér sko að leita uppi Zontakonu og versla af henni amk eina nælu.