Vangaveltur

Er það ekki hið besta mál að þetta sé skoðað. En í þessu samhengi verður ekki hjá því komist að horfa á það að FME gaf grænt ljós á þessa Icesave reikninga. Spurning hvort það að einhverju leyti fríi þá sem til stofnuðuð undan ábyrgð.  Það verður fróðlegt að fylgjast með framvindu þessa máls.

Ríkið í mál vegna Icesave

Maður að meiri

Forstjóri Straums-Burðaráss er maður að meiru að að biðja afsökunar á því að hann og fleiri sem komu að málum við endurskipulagningu skuli ekki hafa verið tengdari við okkar nýja íslenska veruleika en raun ber vitni.  Væntanlega mun tillögunum um launakjörin breytt í kjölfarið.

Biðst afsökunar fyrir Straum

Hugmyndaauðgi

Það er eitursnjallir almannatenglar sem láta sér detta svona verkefni í hug. Og að fá til siðsinnis við verkefnið fv. vasaþjófa og notfæra sér þannig einstaka hæfileika þeirra. Og fá síðan um verkefnið alþjóðlega umfjöllun í fjölmiðlum, sem skilar TalkTalk kynningu upp á miklu meiri fjárhæðir en þau 100 þús. pund sem þeir gefa með þessum hætti.

Getum við fengið hugmyndasmiðina til að hjálpa okkur til að endurreisa vörumerkið "Ísland"?

Vasaþjófar lauma seðlum á fólk

Umhugsunarefni

Var virkilega ekki hægt að finna konu með engar óheppilegar tengingar sem þessar til að fylla þetta sæti í bankaráðinu? Og ef það var ekki hægt hefði verið tilvalið að finna karlmann með engar óheppilegar tengingar því það vill svo til að í þessu bankaráði eru eingöngu kvenmenn. Þar hefði því verið tilvalið að setja eins og einn karlmann í viðleitni til að hafa bæði karla og konur í sama bankaráðinu ... 

Þó Ísland sé lítið land þá á ekki að þurfa að bjóða upp á að svona stöður komi upp.

Skuldar milljarða og eiginkona forstjórans í bankaráði

Skrítin fullyrðing

Niðurstöður af þessu tagi koma fram þegar nánast engin hreyfing er á markaði. Það er fráleitt að fasteignaverð á Íslandi sé að hækka. Þvert á móti er það á niðurleið og á því miður sennilega eftir að lækka enn. Fasteignamarkaðurinn er svo gott sem botnfrosinn, þó alltaf seljist ein og ein eign, oftast í makaskiptum. Þar geta báðir aðilar ákveðið hvaða kaup-og söluverð þeir setja, ágreiningurinn snýst um mismuninn. Verð eigna í makaskiptum er því ekki réttur mælikvarði á þróun fasteignaverðs.

Væntingar markaðarins eru að fasteignaverð eigi eftir að lækka enn. Seljendur eru að vonum ekki ánægðir með þá þróun. Væntanlegir kaupendur bíða eftir lækkuninni og svo virðist sem þeir viti að biðin verður lengri því leigumarkaðurinn sýnist blómstra.

Það bíða allir eftir skjaldborg ríkisstjórnarinnar um heimilin og á meðan gerist ekkert ....

Fasteignaverð hækkar

Ekkert lært?

Það koma á óvart fréttir um að fyrirhugað sé að gera  mögulegar miklar bónusgreiðslur til starfsmanna Straums. Flestir virðast sammála um að ofurlaun og bónusar hafi verið drifkraftur þess sem endaði í hruninu. Það kemur því á óvart ef mann virðast ætla að byrja upp á nýtt með því að endurtaka mistökin.

Furðar sig á bónusgreiðslum

Nýyrðasmíð

Einhvern veginn finnst mér orðið atgervisflótti miklu viðkunnanlegra og fallegra orð fyrir enska hugtakið brain drain heldur en nýyrðið "spekileki" sem verið er að nota hér í fréttinni ...

Óttast íslenskan spekileka

Þjóðir, fjölskyldur

Með Icesave fyrirvörunum mun Alþingi tilkynna umheiminum, en fyrst og fremst kröfuhöfunum Bretum og Hollendingum, að til greiðslu af Icesave skuldbindingunni (lánunum) komi ekki nema tilteknar efnahagslegar forsendur gangi eftir.

Nú er það svo að fjöldi fjölskyldna í landinu er í ýmsu tilliti í sambærilegri stöðu og íslenska ríkið í þessu sambandi. Á þeim hvíla skuldbindingar sem ekki  er öruggt að þær standi undir. Skuldabyrðin hefur aukist verulega hjá fjölskyldum. Gengislán hvers höfuðstóll var í íslenskum krónum kannski 12 milljónir króna þegar það var tekið til húsnæðiskaupa fyrir nokkrum misserum er nú kannski 26 milljónir króna af ástæðum sem fjölskyldan með engum hætti ber ábyrgð á. Verðtryggt lán, hvers höfuðstóll var kannski 22 m.kr. þegar það var tekið til húsnæðiskaupa fyrir nokkrum misserum er nú kannski 29 m.kr. vegna verðbólgu sem fjölskyldan ber enga ábyrgð á að rauk upp. Höfuðstóll, beinharðir peningar sem fjölskyldan átti og setti í húsnæðiskaup sín fyrir nokkrum misserum er löngu brunnin upp, vegna samspils verðbólgu og gengishruns.

Ef fjölskyldur í landinu, í þeirri stöðu sem að framan er rakin, myndu nú taka sig til og setja efnahagslega fyrirvara við greiðslu sína á skuldbindingum sem á þeim hvíla. Hvernig ætli íslenskar lánastofnanir muni bregðast við slíkum fyrirvörum?  

Ríkisstjórnin lofaði því að um fjölskyldurnar í landinu yrði reist skjaldborg til að þær gætu staðið undir afleiðingum þeirra áfalla sem gengishrun og óðaverðbólga leiddi af sér. Ég veit ekki um neinn sem hefur fundið fyrir þeirri skjaldborg, enda öll orka ríkisstjórnarinnar farið í mál eins og aðildarviðræður að EB og Icesave. Nú eru þau mál að baki. Þá hlýtur að vera komið að heimilunum í landinu og aðgerðum þeim til bjargar. Í ljósi þess tillits sem ríkisstjórnin og við ætlumst til að erlendir kröfuhafar sýni okkur vegna Icesave er ekki tímabært að ríkisstjórnin og lánastofnanir fari að skoða stöðu íslenskra fjölskyldna útfrá sambærilegum forsendum og við höfum skoðað Icesave málið? Og setji einhverja efnahagslega varnagla fjölskyldum til hagsbóta?

Fleiri fari að dæmi Íslands

Glæsilegt

hjá stelpunum að rúlla Serbunum svona upp og gott veganesti fyrir framhaldið. Þær eru svo sannarlega að standa sig og eru okkur til mikils sóma.

Margrét Lára sá um Serbana

Vonandi gengur þetta eftir

Gott er, ef satt er. Vonandi gengur þetta eftir og verkefnið verði mikilvægt innlegg í þá uppbyggingu atvinnulífs sem við þurfum á að halda. Og vonandi verða þeir sem fá atvinnu við framkvæmdirnar á byggingartímanum einhverjir þeirra fjölmörgu sem nú eru atvinnulausir. Í fréttina vantar hins vegar algerlega upplýsingar um það hversu mörg atvinnutækifæri til framtíðar skapast við gagnaverið. Það er það sem skiptir meginmáli þó fjöldi starfa á framkvæmdatímanum sé mikilvægur líka.

Talið líklegast að risavaxið gagnaver rísi á Blönduósi