Óhróður

Lögmenn mega, eins og ýmsar aðrar stéttir, una við það að gagnaðilar leggjast gegn þeim persónulega fyrir það eitt að vinna vinnuna sína. Ég sé á visir.is að kona ein, sem er gagnaðili í máli sem ég rek fyrir fv. eiginmann hennar, vandar mér ekki kveðjurnar. Svona skrif dæma sig auðvitað sjálf. Staðreyndin í málinu er sú að konan var dæmd til að greiða fv. eiginmanni sínum málskostnað, því hún tapaði máli gegn honum. Héraðsdómur taldi þar með eðlilegt að hún greiddi málskostnað, án tillits til félagslegrar stöðu hennar. Umbj. minn vill eðlilega innheimta þennan málskostnað og það geri ég fyrir hann, með þeim leiðum sem lög gera ráð fyrir. Fleira er ekki um þetta mál að segja.

Kallar á skýringar

Það kemur á óvart og vekur sérstaka athygli, í ljósi stöðu mála, að Seðlabanki Íslands skuli ekki vera með í þessum samningi. Fjölmiðlar hljóta að kalla eftir skýringum bankans á því og vekur raunar furðu að svo hafi ekki verið gert áður en þessi frétt var skrifuð.

Seðlabanki Íslands ekki með

Hvað

skyldu þeir hafa fengið þessir forsvarsmenn ef félagið hefði ekki orðið gjaldþrota?

Stjórnendur Lehman fá bónus

Af hverju er verið að leigja?

Fróðlegt hefði verið að fá í fréttina hver var heildarbyggingarkostnaður byggingarinnar. Borgin er búin að greiða tæpan milljarð vegna innréttinga og húsgagna og greiðir svo hátt í hálfan milljarð á ári í leigu. Ég trúi ekki öðru en að byggingarkostnaður sé greiddur upp með slíkri leigu á örfáum árum. Hver er ávinningurinn fyrir okkur útsvarsgreiðendur í Reykjavík? Í fljótu bragði er hann ekki alveg augljós.

Ársleiga í Borgartúni 414 milljónir

Vantar eitthvað í frásögnina?

Reglur eru alveg skýrar. Ef barn lýtur eingöngu forsjá móðurinnar, eins og sagt er í fréttinni þá á einfaldlega ekki að vera hægt að flytja lögheimili barnsins, hvort sem er innanlands eða til útlanda nema með hennar samþykki og áritun á flutningspappíra. Miðað við þá framkvæmd sem ég þekki í þessum málum þá virðist sem einhverjar blaðsíður vanti í söguna. Nema embættismenn hjá Þjóðskrá hafi gert svona herfileg mistök. Fyrirfram á ég bágt með að trúa því en hafi það verið gert þá er Þjóðskrá skv. minni reynslu fljót að leiðrétta slíkt.

Fluttur til Noregs án samþykkis móður

Það verður fróðlegt

að sjá hvort þessi atkvæði skili sér öll þegar upp er staðið. Það mun tíðkast að lönd lofi fleiri en einum stuðningi í svona baráttu þannig að síst af öllu skyldum við treysta því að sætið sé í hendi, hvað sem stuðningsyfirlýsingum líður. Hef hins vegar efasemdir um skynsemi þess að leita eftir þessu kjöri.

140 þjóðir hafa lýst yfir stuðningi við framboð Íslands

Eina rétta í stöðunni

Það er ánægjulegt að ríkissáttasemjari skuli hafa tekið ákvörðun um að leggja fram miðlunartillögu. Vonandi tekst með henni að leysa þessa deilu með farsælum hætti.

Verkfalli aflýst

Meira um staðgöngumæðrun

Það má ekki drepa þessu máli á dreif. Ýmis nágrannalönd okkar hafa lögleitt staðgöngumæðrun og leyst mörg þau vandamál sem vísað er til í þessari frétt. Vissulega þarf umræðu, en vonandi verður markmið hennar að tryggja að staðgöngumæðrun verði lögfest hér. Kostirnir, að mínu mati, yfirvega þá annmarka sem á lögleiðingu kunna að vera. Eins og ég hef áður minnst á á þessum vettvangi þá höfum við tekið skref á þessu sviði sem kalla á að staðgöngumæðrun verði næsta skrefið. Flóknara er þetta ekki.

Staðgöngumæðrun „má ekki verða atvinnuvegur“

Jákvætt skref

Það er gott að heyra að setja eigi á laggirnar hóp til að skoða staðgöngumæðrun. Þegar lögin um tæknifrjóvgun voru lögfest fyrir liðlega áratug var staðgöngumæðrun bönnuð. Síðan hefur margt breyst. Lönd, sem áður bönnuðu staðgöngumæðrun, leyfa hana undir ströngum skilmálum. Það er sjálfsagt, eðlilegt og nauðsynlegt að löggjöf okkar fylgi þróun á þessu sviði. Með staðgöngumæðrun opnast enn fleiri pörum möguleiki á því að eignast börn, gagnkynhneigðum sem samkynhneigðum. Við höfum gert breytingar á löggjöf okkar um tæknifrjóvgun í þá veru að segja það mannréttindi að eignast barn. Upphaflega var litið svo á að tæknifrjóvgun væri meðferð við ófrjósemi. Eftir að það skref var stigið, að opna tæknifrjóvgunarmeðferð fyrir samkynhneigðum konum hlaut það einungis að vera tímaspursmál hvenær við tækjum það næsta, þ.e. að leyfa staðgöngumæðrunina. Umræðan á Alþingi og ummæli heilbrigðisráðherra benda til undirbúnings að því. Því ber að fagna.

Um staðgöngumæðrun bloggaði ég í apríl 2007 og má lesa þá færslu hér.

Rætt verði um leg að láni

Óklókt?

Einhvern veginn finnst mér það ekki sýna mikinn samningsvilja að höfða mál gegn viðsemjandanum. Í Morgunblaðinu í dag er skýrt frá nýrri könnun á þróun í launamun kynjanna. Niðurstaðan sýnir bakslag í þeirri þróun, þ.e. að munurinn hafi aukist og meira hjá ríkinu en VR félögum milli áranna 2007 og 2008. Í stjórnarsáttmálanum eru skýr fyrirheit um aðgerðir varðandi kynbundinn launamun og hvað gera skuli. Einhvers staðar verður að byrja. Er ekki tilvalið að sýna í verki að alvara fylgdi fyrirheitum stjórnarsáttmálans og gefa samninganefnd ríkisins breytt fyrirmæli svo ljósmæðradeiluna megi leysa? Nú er lag að sýna viljann í verki.

Ljósmæður: Uppsagnir löglegar

Áhugaverður fundur

Það voru fróðleg framsöguerindi oddvita meirihlutaflokkanna í Reykjavík í Valhöll í hádeginu. Sérstaklega fannst mér áhugavert að heyra lýsingar oddvita Framsóknarflokksins á Tjarnarkvartettssamstarfinu - 100 daga samstarfinu. Þar birtist aðeins önnur mynd en hingað til hefur verið reynt að mála af því samstarfi. En oddviti Framsóknarflokksins sagði líka að meirihluti Sjálfstæðisflokks og Framsóknarflokks hefði í raun verið eina starfhæfa meirihlutasamstarfið í þeirri stöðu sem mál eru nú í borginni. Sjálfsagt er það rétt mat. Það er greinilega góð pólitísk kemistría milli oddvitanna og ekki annað að heyra en að bæði ætli að láta þetta samstarf standa út kjörtímabilið. Fyrirspurnir báru með sér að skipulagsmál eru ofarlega í hugum borgarbúa. Þar er verk að vinna fyrir nýjan meirihluta. Fyrir nýjan meirihluta er mikilvægast að endurvinna með verkum sínum traust borgarbúa. En ég saknaði þess að sjá ekki aðra borgarfulltrúa Sjálfstæðisflokksins á fundinum.

Fjármálin í forgang

Spennan eykst

Ég bloggaði um daginn hvort það hafi verið klók hjá McCain að velja Palin sem varaforsetaefni. Nýjustu skoðanakannanir benda til að a.m.k. ennþá sé framboð McCain að hagnast meira á því vali. Forsetakosningarnar í Bandaríkjunum verða 4. nóvember. Þangað til eru nákvæmlega 8 vikur. Vika er langur tími í pólitík, hvað þá 8 vikur. En eins og staðan er núna bendir ýmislegt til þess að Obama hefði kannski átt að skoða betur að velja Hillary sem sitt varaforsetaefni.

Hvítar konur styðja McCain í auknum mæli