Spennandi kosninganótt framundan

Fyrstu tölur sýnast í allmiklu samræmi við síðustu skoðanakannanir. VG virðist þó hafa fatast flugið á lokasprettinum, eins og svo oft áður. Spurning er hvort afdráttarlaus andstaða formanns VG við EB í lokaþættinum í gærkvöldi hafi haft neikvæð áhrif á kjósendur, þegar í kjörklefann var komið.

Það er sérkennilegt að heyra formann Samfylkingarinnar tala um að Sjálfstæðisflokkurinn sé búinn að fá löngu tímabært frí frá stjórnarsetu. Er formaður Samfylkingarinnar búinn að gleyma því að 2007 var það hennar flokkur, Samfylkingin, sem frekar vildi leiða Sjálfstæðisflokkinn til áframhaldandi stjórnarsetu og stjórnarforystu, þrátt fyrir 16 ár í ríkisstjórn, heldur en að fara í stjórnarsamstarf við VG? Þá fannst formanni Samfylkingarinnar ekki ástæða til að gefa Sjálfstæðisflokknum frí.

Svo er það auðvitað umhugsunarefni að Samfylkingin skuli af kjósendum vera talin enga ábyrgð bera á hruninu. Var hún þó í ríkisstjórn og fór með mikilvæg ráðuneyti eins og viðskiptaráðuneytið.

En það er rétt að Sjálfstæðisflokkurinn hefur örugglega gott af því að vera um skeið utan ríkisstjórnar. Það skiptir ekki máli hvað flokkurinn heitir. Enginn stjórnmálaflokkur hefur ekki gott af því að vera of lengi við völd.

Fréttaskýring: Stærsta vinstrisveiflan

Athugasemdir

[Skúli Víkingsson, 25.4.2009 kl. 23:54]

Ekki er hægt að gleðjast mikið yfir þessu, en þetta er í líkingu við það sem leit út fyrir í skoðanakönnunum, þ.e.a.s. varðandi Sjálfstæðisflokkinn. Samfylkingin hins vegar er sigurvegarinn eins og þetta lítur út núna, en ekki sósíalísku flokkarnir, eins og skoðanakannanir bentu til. Sá möguleiki að S getur myndað stjórn með B og O hlýtur að vera verulegt áhyggjuefni fyrir VG.