Með góðu eða illu

Í umræðunni um stjórnlagabreytingarnar, sem minnihlutastjórnin hefur lagt fram í fullkomnu ósamkomulagi við stærsta þingflokkinn á Alþingi, hefur komið fram að hæstvirtur forsætisráðherra virðist ekki  hafa kynnt sér allar þær umsagnir sem borist hafa. Eru það þó umsagnir frá hluta þjóðarinnar, sem hæstvirtur forsætisráðherra skýlir sér á bak við þegar hún segir nauðsynlegt að knýja breytingarnar fram. Umsagnirnar, sem eru kringum þrjátíu talsins, vara flestar við því að anað sé í stjórnlagabreytingar með þeim hætti sem minnihlutastjórnin ætlar að gera.

En hæstvirtur forsætisráðherra hlustar ekki. Breytinguna skal keyra í gegn.

Sambærileg staða kom upp vorið 2007. Þá ákvað ríkisstjórn Sjálfstæðisflokks og Framsóknarflokks að leggja fram stjórnlagabreytingu í trássi og án samráðs við þá þingflokka sem þá voru í minnihluta, þ.e. Vinstri græna og Samfylkinguna. Í 1. umræðu kvörtuðu þingmenn VG og Samfylkingarinnar sáran yfir vinnubrögðunum og höfðu uppi stór orð um þau. Þeir töldu þau ólýðræðisleg.

Öll þessi ummæli rifjaði ég upp í morgun í ræðu minni á Alþingi og kallaði eftir skýringum VG og Samfylkingarinnar á því hvað hefði breyst. Það kom mér þó ekki á óvart að engin svör bárust. Það hefur nefnilega ekkert breyst. Athugasemdir minnihlutans þá voru fullkomlega réttmætar líkt og athugasemdir okkar sjálfstæðismanna nú eru.

En 2007 hlustaði ríkisstjórnin á minnihlutann og hætti við að knýja fram stjórnlagabreytinguna. Ríkisstjórnin nú hlustar ekki. Minnihlutastjórnin, í boði Framsóknarflokksins, ætlar að knýja þessa breytingu í gegn. Í fyrsta sinn í hálfa öld. Það er umhugsunarverð vinnubrögð.

Enn fjölmargir á mælendaskrá

Athugasemdir

[Þórarinn Þ Gíslason (IP-tala skráð) 4.4.2009 kl. 01:10]

Má ég minna þig á að þó að þessa dagana séuð þið stærst flokka ennþá.

Það er bara ekki nóg.

ÞJóÐIN stendur að baki Jóhönnu og Steingrími.

Það ætti að nægja !

OG þið sjáið það á kosningadaginn,hversu hrapalega þið fóruð að ráði ykkar.

[Eyjólfur Sturlaugsson, 4.4.2009 kl. 02:05]

Þetta er greinilegt málþóf.  Ég hef verið heimavið að vinna verkefni og getað hlustað talsvert á umræðurnar.  Það eru allir farnir að endurtaka sig og það fyrir svona degi síðan.

Ég held að ég láti vera að kjósa Sjálfstæðisflokkinn í þetta skiptið, beið spenntur eftir því hvað gerðist þegar Bjarni tæki við. En það varð bara Búmm.

kv.

ES

[Máni Atlason (IP-tala skráð) 4.4.2009 kl. 02:12]

Sæl og blessuð Dögg.

Það er skylda allra skynsamra þegna landsins að gera hvað þeir geta til að koma í veg fyrir að þetta stjórnlagafrumvarp verði samþykkt. Vonandi tekst það.