Montréal

Fyrr á árinu þegar staða mála var nú talsvert bjartari en hún er nú, boðaði Lögmannafélag Íslands til ferðar fyrir félagsmenn á Íslendingaslóðir í Kanada. Mig hefur lengi dreymt um að fara slíka ferð þannig að ég bara bókaði mig. Í maí var svo að hrökkva eða stökkva, borga ferðina eða taka áhættu með kostnaðinn. Ég hélt mig við ákvörðunina og greiddi upp ferðina, enda óraði engan á þeim tíma fyrir því sem í ljós hefur komið.

Á mánudag var svo komið að þessu. Það var auðvitað með hálfum huga sem farið var af stað, eins og mál höfðu þróast.

En til Montréal erum við komin, liðlega 20 manna hópur lögmanna og maka. Í dag, þriðjudag, vorum við á eigin vegum að skoða borgina. Þetta er falleg borg, hafnarborg, þótt hún liggi ekki að sjó. Borgin er evrópsk og franska meira töluð en enska, þótt flestir geti talað ensku þegar á reynir. Enda er hún stærsta frönskumælandi borgin utan Evrópu. Vegna frjáls falls krónunnar er allt dýrt. Það eina jákvæða við það er að maður tímir ekkert að kaupa. Sem betur fer kostar það ekkert að rölta og skoða sig um og það gerðum við í allan dag. M.a. var skoðaður Jean-Talon markaðurinn í litlu Ítalíu. Þar rakst ég á þetta skemmtilega blómkál sem ég gat ekki stillt mig um að smella mynd af. Myndin sýnir það ekki nægilega vel, að blómkálið vinstra megin er gult, en ekki hvítt eins og venjulega - greinilega sést að blómkálið hægra megin er fjólublátt. Erfðabreytt blómkál? Engin svör fengust við því.

Krónan veiktist um 5,3%