Hetjur

Konurnar 22 sem fóru til New York fyrir helgi til að taka þátt í Avon göngunni, hafa náð takmarki sínu. Þær komu saman í mark í dag, sunnudag, og höfðu þar með allar sem ein lagt að baki 63 km eða eitt og hálft maraþon (sjá hér).

Fyrir nokkrum dögum bloggaði ég um þennan kraftmikla hóp kvenna, sem sumar þekkja af eigin raun baráttuna við brjóstakrabbamein. Þær ákváðu að leggja sitt af mörkum í þágu aukinna rannsókna á brjóstakrabbameini og orsökum þess með þátttöku í þessari göngu.  Þjálfarinn þeirra, Guðný Aradóttir, hefur á röskum mánuði klifið Kilimanjaro og nú gengið með hópnum eitt og hálft maraþon. Í millitíðinni hélt hún upp á 55 ára afmælið sitt. Ég á vart orð til að lýsa aðdáun minni á þessum frábæra hópi kvenna.

Ég óska hópnum innilega til hamingju. Þetta er ólýsanlega flottur árangur hjá þeim. Jafnframt treysti ég því að þær hafi frumkvæði að íslenskri Avon göngu sem allra fyrst, helst að ári. 

Athugasemdir

[Kristín Dýrfjörð, 8.10.2007 kl. 01:45]

Þær eru sannar hvunndagshetjur þessar konur.  Minna okkur hinar (hin) á hvað við getum ef vilji er fyrir hendi.

[Dísa Dóra, 8.10.2007 kl. 08:20]

Mikið er ég sammála þér með að þær eru algjörar hetjur þessar konur

[Golden Wings, 8.10.2007 kl. 14:00]

Við erum fimm konur hjá Icelandair sem tókum okkur saman og gengum í Avon göngunni.  Sendi þér slóðina okkar

http://www.golfborgir.is/NYganga/index.php

http://goldenwings.blog.is/blog/goldenwings/

Á blog síðunni okkar eru fullt af myndum úr göngunni meðal annars frá því þegar við hittum Göngum saman stelpurnar.

Kær kveðja

Golden Wings