Í samhengi við gjafalán til fjárfestingabanka

Já, setjum þessar fjárhæðir endilega í samhengi við annað, t.d. gjafalán ríkissjóðs til tveggja fjárfestingabanka sem Morgunblaðið hefur fjallað um í vikunni.

Ríkissjóður lánaði nýverið tveimur fjárfestingabönkum, að því er virðist án mikillar umhugsunar, 42 milljarða til sjö ára á 2% verðtryggðum vöxtum. Kunnugir telja að eðlilegir verðtryggðir vextir á lánunum til bankanna hefðu verið a.m.k. 10%. Gróft metið má því telja að ríkissjóður sé að gefa hluthöfum bankanna a.m.k. tæpa 3,5 milljarða á ári.  

Á sjö ára lánstíma gefur ríkissjóður hluthöfunum sennilega hátt í 25 milljarða króna. Sú fjárhæð sýnist tæplega 10% af því sem sagt er í fréttinni að það muni kosta að fella flatt niður 20% húsnæðisskulda u.þ.b. 70.000 heimila í landinu. Ríkissjóður gerði enga kröfu til hlutafjár í bönkunum sem nutu þessarar fyrirgreiðslu. Því halda hluthafarnir öllu, óskertu.

Í verkefnaskrá ríkisstjórnar VG og Samfylkingarinnar, sem stendur að þessum örlætisgerningum í þágu hluthafa fjárfestingabankanna tveggja, segir m.a.

...Stjórnin byggir því á mjög aðhaldssamri og ábyrgri stefnu í efnahags-og ríkisfjármálum, en mun jafnframt hafa í heiðri félagsleg gildi, hugmyndafræði sjálfbærrar þróunar, kvenfrelsi, jöfnuð og réttlæti. ... (leturbreyting DP)

Niðurfelling skulda óhagkvæm

Athugasemdir

[Magnús Hreinsson (IP-tala skráð) 28.3.2009 kl. 08:51]

Mér finnst að það vanti einnig í umræðuna að samkv. upplýsingum síðustu vikna hafi hluthafar og einkavinir Kaupþing banka, rétt fyrir hrunið, lánað sér uppreiknað 570 milljarða kr.  Samkv. gagnagrunni Seðlabankans er verið að tala um að það séu 78 þúsund heimili í landinu þannig að upphæðin sem útrásarvíkingarnir fengu sér að láni í Kaupþingi mundi nægja til að greiða niður lán allra heimila landsins um 7,3 milljónir króna.  Þarna er bara verið að fjalla um einn banka, ekki hefur komið fram hve mikla fjármuni eigendur og vildarvinir hinna bankanna, Landsbankans, Glitnis og Sraums Burðarás hafi verið að lána sér rétt fyrir hrunið. 

[Þórður Björn Sigurðsson, 28.3.2009 kl. 11:43]

Afstaða stjórvalda í þessu máli er úti á túni.

Hagsmunasamtök heimilanna hafa lagt til mjög hóflega og sanngjarna aðferð um hvernig megi taka á málinu.

Hún er sú að  boðið verði upp á að gengistryggðum lánum verði breytt verðtryggð í krónulán frá lántökudegi og samhliða takmarkist verðbótaþáttur við efri mörk verðbólgumarkmiða Seðlabankans, 4%, frá og með 1. janúar 2008.

Forvitinlegt væri að sjá útreikninga reiknimeistara ríkisins á þessari aðgerð. 

Marinó G. Njálsson hjá HH hefur reiknað út að þetta séu 206 milljarðar.

Svo má ekki gleyma að minnast á ávinningin af slíkum aðgerðum.

• Fjöldagjaldþrotum heimilanna og stórfelldum landflótta afstýrt
• Stuðlað gegn frekari hruni efnahagskerfisins
• Jákvæð áhrif á stærðar- og rekstrarhagkvæmni þjóðarbúsins
• Líkur aukast á að hjól atvinnulífsins og hagkerfisins haldi áfram að snúast þar sem fólk mun hafa ráðstöfunartekjur til annarra útgjalda en afborgana af íbúðum
• Þjóðarsátt um vanda heimilanna vegna efnahagskreppunnar
• Traust almennings í garð stjórnvalda og fjármálastofnanna eflist á ný