Hreinlegra

Ef formaður Samfylkingarinnar er nú kominn á þá skoðun að flýta eigi Alþingiskosningum þá finnst mér hreinlegra að segja það beint út í staðinn fyrir að tengja þá vangaveltu alls óskyldri umræðu um það hvort efna eigi til kosninga um hvort fara eigi í aðildarviðræður við EB. Ef efnt verður til Alþingiskosninga fljótlega liggur í augum uppi að þær munu snúast um afstöðu flokkanna til aðildarviðræðna við EB og aðildar að EB. Flokkarnir munu þurfa í slíkum kosningum að hafa skýra og skorinorða stefnu í EB málum. Flokkur sem er á móti aðild að EB sér tæpast tilgang í því að fara í aðildarviðræður við EB, eða hvað? Kjósendur sem vilja aðildarviðræður  við EB kjósa tæpast þann eða þá stjórnmálaflokk(a) sem hafa það á stefnuskrá sinni að vera á móti EB aðild, eða hvað?

Úr því sem komið er tel ég eðlilegast að Alþingi ákveði sem fyrst á þessu ári hvort gengið verið til aðildarviðræðna við EB. Styðji meirihluti þingmanna slíka tillögu þá verði gengið til viðræðna við EB eftir að samningsmarkmið hafa verið sett. Viðræðum verði síðan hraðað svo sem kostur er og í kjölfarið efnt til Alþingiskosninga sem jafnframt verða kosningar um samningsdrögin sem þá myndu liggja fyrir. Miðað við það sem sagt hefur verið um hraða samningsviðræðna ættu slíkar Alþingiskosningar að verða haustið 2009 eða í síðasta lagi vorið 2010.

Alþingiskosningar samhliða

Athugasemdir

[Víðir (IP-tala skráð) 2.1.2009 kl. 23:01]

Væri ekki eðlilegt að athuga fyrst hvort að ríkisstjórnin starfi enþá með vilja almennings áður en að henni verður leyft að hefja undirbúning að aðildaviðræðum við ESB ?

 Er ekki kominn tími til að ráðamenn taki mark á þeim þúsundum er mótmæla alla laugardaga ?

Er það siðlegt að þeir taki svona drastískar ákvarðanir þegar að fæstir virðast vilja hafa þá á Alþingi á annað borð ?

[Ólafur Ingi Hrólfsson, 2.1.2009 kl. 23:03]

Hreinlegra!!!!!

Ágæta Dögg - enn hef ég ekki séð neitt hreinlegt við Ingibjörgu Sólrúnu eða hennar opinberu störf - Bakstungur eru miklu frekar hennar stíll - Hún skammaði 2 samráðherra sína fyrir nokkru þegar þau töluðu um kosningar. Núna virðist henni vindurinn blása af annari átt . Þá heykist hún á því að hafa stefnu og halda henni.

Enda hvernig á það líka að vera - vingull og tækifærissinni getur ekki haft neina stefnu eða staðfestu.

Ólafur I Hrólfsson