Ný lög í Danmörku um forsjá barna

Nýlega voru samþykkt í Danmörku ný lög um forsjá barna. Lögin ganga í gildi 1. október 2007. Nýmæli laganna eru einkum tvö:

1. Sameiginleg forsjá verður meginregla. Hér feta Danir í fótspor m.a. Íslendinga. Þessa breytingu gerðum við á barnalögum vorið 2006.
2. Dómstólar mega dæma sameiginlega forsjá, jafnvel þótt foreldrarnir sjálfir vilja slíta henni. Hér ganga Danir skrefi lengra en við höfum enn gert.

Svokölluð forsjárnefnd, sem ég veitti forystu, lagði til bæði í áfangaskýrslu sinni 1999 og lokaskýrslu sinni í mars 2005 að sameiginleg forsjá yrði meginregla hér á landi. Það náðist með breytingu á barnalögum vorið 2006. Í lokaskýrslu sinni gekk forsjárnefnd skrefi lengra og lagði til að að dómstólar gætu dæmt sameiginlega forsjá. Sú breyting hefur ekki enn náð fram að ganga.

Vonandi verður þess ekki langt að bíða að frekari breytingar verði gerð á barnalögum þannig að dómstólar megi dæma sameiginlega forsjá. Ég er sannfærð um að slík lagabreyting muni fækka forsjárdeilum foreldra til mikilla muna.

Athugasemdir

[Árni Helgi Gunnlaugsson, 3.6.2007 kl. 16:07]

Algjörlega sammála þér.  Mjög undarlegt, að dómstólar geti ekki dæmt sameiginlega forsjá.

Einnig má fara að kíkja á lagasetningu varðandi tvö lögheimili barna.  Að löggjafinn viðurkenni bara eitt lögheimili er tímaskekkja.  Það færist mjög í vöxt, að feður séu farnir að taka stöðu sína í uppeldi barna sinna.  Hluti af því er jöfn umgengni við börnin.  Til að svo megi verða, verða barnabætur að skiptast jafnt á milli tveggja heimila og barnameðlög að þurrkast út, kjósi foreldrar að hafa jafna umgengni.  Tvö lögheimili eru því augljóst næsta skref, ásamt því að dómstólar fái að dæma sameiginlegt forræði.

[Dögg Pálsdóttir, 3.6.2007 kl. 20:40]

Nákvæmlega - en um þetta fjallaði ég í pistli hér á bloggsíðunni í kosningabaráttunni. Fv. félagsmálaráðherra lofaði Félagi ábyrgra feðra að setja í gang vinnu með tvö lögheimili barna í tilefni af fystra feðradeginum í nóvember 2006. Ég held að það sé fullt tilefni til að kanna stöðu efnda á því loforði og herja á nýjan félagsmálaráðherra til að ýta málinu áfram.

[Gísli Gíslason, 3.6.2007 kl. 23:40]

Mjög gott innlegg og mikilvægt að halda þeirri umræðu vakandi að börn eiga rétt á báðum foreldrum, óháð hjúskaparstöðu foreldranna.  Þannig er það dapurt að það sé ekki ennþá viðurkennt hér á landi að barn geti átt heima á  tveimur stöðum. Það er einnig dapurt að annað foreldrið geti svipt barnið forsjá hins foreldrisns.  Dómari ætti að hafa heimild til að dæma það sem er barni fyrir bestu og heimild til að dæma í sameiginlega forsjá, ef hann telur það barni fyrir bestu.