Ósmekklegt

Árni Páll Árnason er lögfræðingur og í framboði fyrir Samfylkinguna í Kraganum. Hann skrifar í Morgunblaðinu á fimmtudaginn undir heitinu "Að verðlauna síbrotamenn". Af heiti greinarinnar mætti ráða að hann sé að skrifa um fyrirkomulag refsivörslu og einhverjar ívilnanir sem síbrotamönnum eru veittar enda er öllum ljóst, ekki síst lögfræðingum, hvað hugtakið síbrotamaður þýðir. Það vísar til einstaklings sem aftur og aftur brýtur hegningarlög og fær refsidóm fyrir.

Við lestur greinar Árna Páls kemur í ljós að þegar hann vísar til síbrotamanna er hann að vísa til verka ríkisstjórnarinnar. Í greininni sjálfri bætir hann um betur og líkir stjórnarflokkunum við "samviskulausa síbrotamenn".

Frambjóðendur sem ætlast til að vera teknir alvarlega geta ekki leyft sér að skrifa með þessum hætti og væna pólitíska andstæðinga um að vera síbrotamenn. Þetta er ósmekklegt, ógeðfellt og dæmir mest þann sem þannig skrifar.

Athugasemdir

[Hlynur Hallsson, 29.4.2007 kl. 15:25]

Hvaða, hvaða, voða viðkvæmni er þetta hjá íhaldinu. Hefur Árni Páll ekki dálítið til síns máls? Þessi ríkisstjórn hefur fengið á sig hæstaréttardóma ítrekað! Bestu kveðjur,

[Dögg Pálsdóttir, 29.4.2007 kl. 19:31]

Ekki kannast ég við það að nokkur þeirra einstaklinga sem er í ríkisstjórninni hafi fengið á sig refsidóm. Þetta er ekki spurning um viðkvæmni, þetta er spurning um að nota réttu hugtökin. Lögfræðingar sem ætlast til að vera teknir alvarlega nota ekki hugtök með þeim hætti sem Árni Páll gerir í umræddri grein.

[Herbert Guðmundsson, 30.4.2007 kl. 18:26]

Árni Páll átti langt samtal við Sigurð G. Tómasson á Útvarpi Sögu, sem mætti vera í minnum haft vegna yfirgengilegra dóma Árna Páls um Sjálfstæðisflokkinn, sem hann líkti við mexíkóska bófaflokka ... og jafn yfirgengilegs smjaðurs í þágu Samfylkingarinnar. Inntantómt blaður!!!

[Inga Lára Helgadóttir, 1.5.2007 kl. 10:46]

Ég sé ekki betur en að stjórnaranstöðumenn margir hverjir svífist einskis til að komast áfram, það er svo leiðinlegt að vera með svona ódrengilega baráttu