Framkvæmdastjóri - framkvæmdastýra

Ef ég man rétt voru það Kvennalistakonur sem byrjuðu á því að kyngreina heiti starfa og þingmenn þeirra kölluðu sig alltaf þingkonur. Síðan hafa orð eins og framkvæmdastýra farið að sjást. Hvað er það sem kallar á þessa aðgreiningu? Ætti ég að kalla mig lögkonu en ekki lögmann? Síðast þegar ég vissi þýðir orðið ,,maður" bæði karlmaður og kvenmaður. Hvað í orðinu framkvæmdastjóri bendir til þess að eingöngu karlmenn gegni því? Af hverju þarf að breyta því í framkvæmdastýra þótt einstaklingurinn sem í því situr sé kvenmaður? Því fyrr sem þessu er hætt, því betra.

Guðfríður Lilja framkvæmdarstýra þingflokks VG

Athugasemdir

[Ólafur Haraldsson, 4.9.2007 kl. 09:39]

Til er gömul, örstutt flökkusaga sem kristallar þann merkingarmun sem í flestra hugum er enn á orðunum maður og kona, hvað svo sem orðabókarskýringum líður. Söguþráðurinn er á þessa leið: "Það standa tveir menn fyrir framan Alþingishúsið. Annar þeirra er óléttur."

Það er svo alveg spurning hvort jafnréttismálstaðnum vinnst betra gagn með því að færa hugtakinu "maður" nýtt inntak smátt og smátt eða með því að nota kvenkynsendingar þar sem við á. En enn sem komið nær orðið "maður" fráleitt yfir bæði kynin til jafns.

Bestu,

[Pétur Guðmundur Ingimarsson (IP-tala skráð) 4.9.2007 kl. 10:58]

Að láta orðið ,,maður'' einungis ná yfir karlmenn, en ekki kvenmenn og karlmenn í senn, er ekkert annað en óþyrmileg erlend áhrif og léleg íslenska.

Málfræði hefur ekkert að gera með jafnrétti. Eða ætti kannski að breyta kyni orðsins ,,svanni?'' En eins og flestir vita þýðir svanni kvenmaður, en er þó karlkynsorð.

[Kristján Sigurður Kristjánsson, 4.9.2007 kl. 11:48]

Ólafur Þórðarson alþm. ávarpað forseta Alþingis alltaf sem "herra forseti" þó stjórn fundarins væri á konu hendi.

Ingibjörg Sólrún er ráð-HERRA, þe. hún er háttsetur karlmaður sem ber sæmdarheitið HERRA og situr í ríkisráði Forseta Íslands.

[alla (IP-tala skráð) 4.9.2007 kl. 20:04]

Af einhverjum ástæðum virðast heiti sumra starfsstétta hafa breyst eftir að aðsókn karla í þær jókst.  Nægir kannski að nefna flugfreyjustéttina.  

[Halla Rut , 5.9.2007 kl. 00:16]

Mín skoðun er að það á alls ekki að breyta heitunum. Það mun skilja á milli kvenna og karla en á ný. Ég vil að þú sért lögmaður. 

Ég er að leita af lögmanni til að taka að sér mál mitt gagnvart Reykjavíkurborg og jafnvel persónulegu máli gegn ákveðnum leikskólastjóra. Syni mínum sem þegar hafði verið úthlutað leikskólapláss hér í Reykjavík, var vísað frá  þegar að honum kom vegna þess að hann er fatlaður "ódæmigerða einhverfu".  Við leituðum til leikskólaráðs Reykjavikurborgar. Þeir lofuðu öllu fögru en hafa síðan þá ekki gert neitt. Þetta hefur sennilega haft ævilöng áhrif á son minn og skert hans möguleika á að ná besta mögulega þroska. 

Mér er sagt að það vilji engin lögfræðingur taka þetta að sér. Mér er sagt að þannig sé þetta á Íslandi. Mér datt bara í hug að nefna þetta við þig þegar ég sá þig á forsíðu bloggsins.

 Kveðja Halla Rut sími: 6605400

[Rannveig Margrét Stefánsdóttir (IP-tala skráð) 5.9.2007 kl. 00:30]

Góður punktur.  Þetta virðist vera einhver ofur viðkvæmni hjá þröngum hópi kvenna.  Ef til vill er hugsunin sú að þær nái einhverju meiru fram í jafnréttisbaráttunni með þessum titlabreytingum. Dálítið kjánalegt að mínu mati.  Einnig finnst mér jafn kjánalegt að heyra alþingismenn ávarpa forseta Alþingis "frú forseti", því forseti er jú karlkyns nafnorð.  

[Halla Rut , 5.9.2007 kl. 00:47]

Reyndar finnst mér Frú Forseti nokkuð smart, Rannveig.

[Sigurður Þórðarson, 5.9.2007 kl. 07:26]

Ég er innilega sammála ykkur Dögg og Pétur. Það er eitthvað viðkunnanlegt, jafnvel fallegt við  orðið frú, líklega er það "nokkuð smart" eins og Halla segir.  Það breytir ekki því að forseti er karlkynsorð eins og Rannveig bendir réttilega á. Þegar verið er að ávarpa forseta er átt við embættið en ekki einstaklinginn, enda er bannað skv. þingsköpum að  nafngreina hann. Hvers vegna í ósköpunum skyldi hann þá vera kyngreindur? Og hvaða tilgangi þjónar það yfirleitt?  Það  er auðvitað ekki í þágu jafnréttis að nauðga okkar gamla og ylhýra móðurmáli. 

Það er ekki endilega málfræðilega rangt að tala um frú forseta, þó það sé afkáralegt og gangi gegn anda þingskaparlaganna.  En það er hrein afbaka að kvennkenna forsetann (hún forsetinn), þá væri illskárra að búa til nýyrðin forstýra, forsæta o.s.f.

[Sigurður Hreiðar, 5.9.2007 kl. 09:37]

Þakka þér fyrir Dögg. Ég gleðst yfir því að fá þetta hljóð úr horni konu sem seint verður sökuð um að láta deigan síga í baráttunni fyrir jafnrétti kynjanna (kvennanna).

Stelpur: fyrir alla muni látið ekki hrekja ykkur af verðinum með því að hopa frá starfsheitum sem málfræðilega eru karlkyns. Verið áfram -stjórar, -menn og -fræðingar en gerið ekki lítið úr sjálfum ykkur með því að breyta þessu yfir í málfræðilegar kvenkynsendingar, eins og þið valdið ekki því sem felst í gamla forminu.

Mbkv.  

[Rannveig Margrét Stefánsdóttir (IP-tala skráð) 5.9.2007 kl. 13:26]

Heyr, heyr, Sigurður Hreiðar.

[Inga Lára Helgadóttir, 5.9.2007 kl. 20:14]

Já Dögg, svo er líka talað um okkur mannkynið ??? þessar kvennréttindakonur hafa held ég bara ekkert annað að gera en að fiska upp einhver orð og aðra tóma vitleysu til að vekja á sér athygli,.... veit að þetta eru kannski svolítið hörð orð hjá mér, en þetta finnst mér í raun.

[Sigurður Þórðarson, 6.9.2007 kl. 10:41]

Mikið erum við öll innilega sammála hérna á síðunni.  Þá er bara eftir að vita hvort Halla nær að semja við Döggu um að leysa úr hennar málum. Ef svo verður fylgja þeim góðar óskir í hetjulegri réttindabaráttu fyrir fatlaðan son hennar. 

[Sigurður Þórðarson, 6.9.2007 kl. 10:45]

Ups . af því að við þykjumst vera málverndunarsinnar þá er víst betra að semja við Dögg en "Döggu" sem þó er algengt "slang". 

[Halla Rut , 7.9.2007 kl. 23:45]

Sigurður. Það vil engin lögfræðingur fara á móti Borginni nú þegar sjálfstæisflokkurinn er við völd. Þannig er það bara.

[Sigurður Þórðarson, 9.9.2007 kl. 00:10]

Halla, ég skal hjálpa þér að finna út úr þessu máli

[Sigurjón Sigurðsson, 9.9.2007 kl. 00:27]

Flott hjá þér Sigurður að bjóða Höllu hjálp, drengilega gert.

Halla, gangi þér vel í baráttunni, þoli ekki óréttlæti í samfélaginu en það er því miður nóg af því.

Kv. Sigurjón Sigurðsson