Varasamur samanburður

Til að forðast allan misskilning þá vil ég byrja þetta blogg á því að segja að ég tel að þyngja megi dóma vegna kynferðisbrota og fullyrði að hægt og sígandi eru dómstólar að gera það, þótt mörgum finnist sú þróun gerast of hægt.

Ég leyfi mér þó að vara við því að bera saman þyngd dóma í fíkniefnamálum annars vegar og kynferðisbrotamálum hins vegar. Það er í raun eins og að bera saman epli og appelsínur. Fíkniefnabrot teljast brot gegn XVIII. kafla almennra hegningarlaga sem fjallar um brot sem hafa í för með sér almannahættu. Einkenni þeirra brota er að fórnarlambahópurinn getur orðið mjög stór. Kynferðisbrot falla undir XXII. kafla almennra hegningarlaga.

Nær væri að bera saman þyngd dóma í kynferðisbrotamálum annars vegar og brotum skv. XXIII. kafla almennra hegningarlaga sem fjallar um manndráp og líkamsmeiðingar. Með slíkum samanburði væri verið að bera saman refsingar við sambærilegri brotum. Ég hvet blaðamanninn til að taka saman slíkan samanburð. 

Hæstiréttur nýtir ekki refsivaldið

Athugasemdir

[Dísa Dóra, 4.10.2007 kl. 09:28]

En geta ekki kynferðisbrotamenn skilið eftir sig mörg fórnarlömb?  Það hefur nú verið talað um að hver kynferðisbrotamaður geti jafnvel skilið eftir sig fórnarlömb svo hundruðum skiptir.

[Fiðrildi, 4.10.2007 kl. 10:16]

Það er bara alls ekkert óraunhæft að bera saman epli og appelsínur . . . hvort tveggja eru ávextir og um margt líkt.

[Geiri.is (IP-tala skráð) 4.10.2007 kl. 10:48]

Ein spurning, eru þessir kynferðisdómar með léttari refsingu miða við ofbeldi yfir höfuð? Er tekið léttara á þeim miða við t.d. hnífstungur eða barsmíðar? Langar að vita það til að bera saman hvort þetta eigi bara við um ofbeldi gagnvart konum og börnum? Er tekið harðara á því ef karlmaður ræðast á annan karlmann með kylfu og lemur hann illa? Eða þegar kona ræðst á karlmann með hnífi? Eða þegar konur berja konu? 

[Ragnheiður , 4.10.2007 kl. 10:55]

Áhugavert innlegg og skýrir þennan mun sem ég t.d. hef aldrei skilið. Takk fyrir það

[Katrín Anna Guðmundsdóttir, 4.10.2007 kl. 15:27]

Þrátt fyrir að brotin tilheyri sitthvorri grein hegningarlaga er samanburður alls ekki óraunhæfur. Það er grundvallarmunur á líkamsmeiðingum og kynferðisbrotum. Sumir barnaníðingar beita mörg börn ofbeldi auk þess sem sum börn eru beitt ofbeldi árum saman. Rétt eins og konur eru líka fólk og konur eru líka menn þá eru konur líka almenningur. Þrátt fyrir að við vitum ekki nákvæmlega hveru útbreitt kynferðisofbeldi er þá eru til rannsóknir sem segja að allt upp í þriðjungur kvenna verði fyrir kynferðisofbeldi á lífsleiðinni. Hvort sem sú tala er rétt eða ekki þá er alveg ljóst að verulega stór hluti kvenna verða fyrir kynferðisofbeldi og það varðar almannahættu. Allt of mörg börn af báðum kynjum eru beitt kynferðisofbeldi og þolendur þessara glæpa eru fleiri en þolendur fíkniefnabrota. Dómsstólar endurspegla það hins vegar ekki en það segir okkur aðallega það að dómsstólar eru ekki í stakk búnir til að takast á við brot sem þessi.  

[Vilborg G. Hansen, 4.10.2007 kl. 18:54]

Sæl Dögg, sammála þessu og vonandi fer umræðan í þenna farveg.

[Kristján Sigurður Kristjánsson, 4.10.2007 kl. 20:41]

Það er athyglisvert að dómarar skuli keyra framúr varðandi kynferðisbrot. En samkvæmt Rómarréttinum eru brot sem sumir kalla mannhelgi, þar sem einn ræfill nauðgar eða ber annan ræfil brot sem ekki vega þungt hjá dómstólum.

Þyngra vega í dómum, þó ekki í lögum, brot gegn hagsmunum keisarans.

Rómarrétturinn lifir enn.

[Gísli Bergsveinn Ívarsson, 4.10.2007 kl. 23:05]

Oft skilur maður ekki hvað verið er að spá  í sumum dómum

[Rannveig Margrét Stefánsdóttir (IP-tala skráð) 4.10.2007 kl. 23:46]

Þakka þér Dögg, fyrir þetta innlegg og mjög svo þörfu og góðu ábendingu og skilgreiningu á ólíkum þáttum laganna.  Það á að þyngja dóma á kynferðisafbrotamálum verulega, að mínu mati. Kynferðisafbrotamál er ekkert annað en sálarmorð þar sem þolendur eiga ævilangt ferli í sársauka- og sálaruppbyggingu.